Myslim Pasha: Bashkim pa kushte nuk mund të kërkohet apo jo?

Sekretari i Përgjithshëm i Aleancës KuqeZi, Prof. Myslim Pashaj, flet për gazetën “DITA”, një ditë pas vendimit të kësaj force politike për të dalë e vetme në zgjedhjet e 23 qershorit.

– Zoti Pashaj, vendimi i AK-së në çastet e fundit për të dalë si forcë më vete në zgjedhjet e 23 qershorit ka befasuar shumë njerëz, madje ka nga ata që ndihen të zhgënjyer. Si do t’u përgjigjeshit të zhgënjyerve në këtë rast?

– Të zhgënjyer jemi edhe ne. Pritshmëria jonë ishte që negociatat të përfundonin pozitivisht. Kjo gjë nuk u arrit dot. Pavarësisht spekulimeve të medha dhe emocioneve të shprehura ndonjëhere edhe zhurmshëm, situate në thelb është e thjeshtë: Nuk u arrit në një konsensus për marrëveshjen e bashkëpunimit. Më lejoni të ndaj me ju një mendim personaltimin. Që në momentin e parë kur PS lajmëroi koalicionin e saj me LSI, patericën kryesore të regjimit berishian në këto vite, mendimi i pare që më erdhi ishte se mundësia e bashkëpunimit në një front opozitar me frymë, moral dhe integritet sapo u komplikua tej mase. Jam i sigurt që ky “bashkim” i PS me LSI ka ndikuar në psikikën dhe emocionet e negociatave. Edhe ashtu nëndheshëm. Mes dilemave të medha të vetvetes sonë por edhe të anëtarësisë sonë, ne megjithatë hymë në negociata. 

Pse duhet të vinit kushte në një koalicion që do bëjë pikërisht atë që shprehni: rrëzimin e Berishës?

Por bashkim pa kushte nuk mund të kërkohet apo jo? Ne kërkonim garanci për votën tonë antiregjim. Ne kemi një mision të madh në këto zgjedhje: Rrëzimin e regjimit më autokratik dhe më të korruptuar të Europës – regjimin

Berishës. Koalicioni opozitar e kishte ulur shumë stekën e moralit politik me lëvizjet e tij dhe prandaj në vendosëm të kërkonim garanci. Këto garanci janë parimore ( siç ishin 6 parimet e parashtruara publikisht si bazë për bashkëpunimin) por janë edhe praktike (siç ishte kërkesa normale për të pasur numërues në tavolinat e numërimit ku bëhet hataja e votave). Këto kërkesa nuk arritën të gjejnë hapësirë. Negociata nuk funksionoi dhe AK do të dalë e vetme. Me këtë palo Kod Zgjedhor të gatuar në mënyrën më të keqe të mundshme, kjo në fakt është zgjidhja më e vështirë për AK. Dalja vetëm në zgjedhje është Politikisht më e vështira, por Moralisht më e mira!

– Megjithatë në tratativat që u bënë gjatë javës së fundit për aleancën me PS-në, AK-ja dhe Spahiu i ndryshuan disa herë qëndrimet, duke shtuar vazhdimisht kërkesa të reja. Si I shpjegoni këto luhatje të udhëheqjes suaj?

– Parimisht, një negociatë është fleksibël dhe ndryshimin e kërkesave/kundërkërkesave e ka në thelb të vet fenomenit. Kjo për të thënë që, parimisht, ndryshimi i kërkesave gjatë negociatave nuk është “hata”, por është në fakt thelbi i procesit. Por duke ju kthyer drejtpërsëdrejti pyetjes suaj, më lejoni të them që ka pasur shumë spekulime për këtë proces, dezinformime, të qëllimshme dhe të paqëllimshme. Unë do t’ju lutesha t’i referoheni edhe njëherë asaj që është bërë publike zyrtarisht, 6 pikave tona parimore.

– Ju flisni me një besim të palëkundur për fitore në 23 qershor. Ku e bazoni këtë optimizëm, kur ligji zgjedhor nuk ju favorizon duke dalë si parti më vete?

– Është e vërtetë që situata e partive që dalin më vete është shumë e vështirë me këtë Kod. Praghyrja në Parlament më shumë se dyfishohet në çdo qark. Por ne kemi besim se fryma jonë e ndryshimit, morali i ndryshimit, shpirtii shqiptarizmës do të triumfojnë në këto zgjedhje. Ne e ndjejmë këtë në të gjitha takimet që organizojmë lagje me lagje a fshat me fshat. Ndihemi besimplotë!

-Meqë jemi te sistemi, votat tuaja me kete sistem favorizojnë Berishën. A nuk bie ndesh me deklaratat ekstreme të partisë suaj kundër Berishës, ky vendim aktual?

– Unë e kam të vështirë ta bëj këtë lidhje “kaq të shkurtër” logjike. Më lejoni të bëj një pyetje – Kush e mbajti Berishën në pushtet këto vite? Vota që u hodhën majtas dhe u shitën djathtas. Kush po e mban Berishën në pushtet sot pasi një pale “iku” nga Qeveria? Vota që u hodhën majtas dhe u shitën djathtas. Ku është garancia e këtyre votave? Ku është morali dhe besimi? Ne kemi propozuar një pakt publik antiregjim. Kemi propozuar një kontratë publike për parimet tona. Më thoni, si mund të gjykohet në menyre kaq të thjeshtuar. Më lejoni edhe një korrektim të vogël për pyetjen tuaj të mëparshme. Deklaratat e Aleancës Kuq e Zi nuk janë deklarata ekstreme. Unë them se janë deklarata realiste dhe plotesisht ligjore.

– Si do të ndiheshit ju, nëse ato vota që mund të merrni do të mbanin në këmbë pikërisht regjimin e Berishës pas 23 qershorit?

– Unë kam besim të plote se regjimi i Berishës i ka orët e numëruara. Kjo është e padiskutueshme. Nuk ka asnjë shans që ky regjim të qëndrojë më në këmbë. Dhe Aleanca Kuq e Zi do të jetë një kontributore kryesore në rrëzimin e këtij regjimi.

Kemi një fenomen “Milloshi” për shembull…

Përsa i përket fenomenit që ju përmendni, edhe këtu ka një ngërç logjik. Problemi nuk është se pse doli “Milloshi” dhe i mori ato vota, problemi është se pse ato vota nuk i more ti! Njerëzit duhet të kenë të gjithë të drejtën të kandidojnë dhe të votojnë kë të duan, jo vetëm atë që u imponohet me manovra imorale.

– Po personalisht si Myslim si do ndiheshit nëse votat tuaja jashtë bashkimit opozitar do bënin atë që ju e mohoni tani: të ndihmonin përcarjen e votës së majtë duke ndihmuar edhe njëherë tjetër një Berishë që ka qenë gjithmonë pakicë dhe ka qëndruar në pushtet nga këto histori?

Unë jam pjesë e Aleancës Kuq e Zi dhe ne funksionojmë si strukturë por meqë po më drejtoheni individualisht, personalisht po ju them se i jam futur kësaj kauze sepse kam një besim se politika shqiptare kishte nevojë për një frymë ndryshimi dhe morali tjetër. Se shqiptarët kishin dhe kanë nevojë të rikthejnë dinjitetin e tyre si qytetarë në mes të Europës.

– Në reagimin e tij ndaj vendimit të Spahiut, Kryetari i PS-së Edi Rama iu përmendte juve me emër, si edhe Pëllumb Xhufin, si një tallje që i është bërë idealizmit dhe përkushtimit tuaj. Si do t’i përgjigjeshit zotit Rama?

– E falënderoj për respektin e treguar. I them t’i mbajë sytë hapur ndaj atyre që ka afruar se nuk kanë histori shumë të “sukseshme” për të treguar. Gjithashtu i kërkoj që të përmbahet në deklaratat e lëshuara. Ne nuk jemi në garë me Koalicionin Opozitar. Jemi në betejë me të Keqen e madhe që ka mbërthyer këtë vend. Ky është misioni ynë. Të tjerat do t’i tregojë koha./Intervistoi: Xh.SHEHU