Çfarë i premtoi pornopolitikani shqiptar Kombëtares sonë nëse fiton me Rumaninë

Menjëherë pas valës së premtimeve joshëse që disa pornostare kanë bërë për lojtarët e kombëtareve të tyre, që të dalin me sukses në ndeshjen e fundit kualifikuese në grupe, një premtim i ngjashëm ka ardhur edhe nga Shqipëria për kombëtaren e De Biazit.

Gojët e Liga thonë se pornopolitikani më i shquar shqiptar i ka premtuar ekipit kombëtar, që nëse fiton me Rumaninë, do t’u ofrojë çunave një leksion dy orësh mbi pornopolitikën. Në mesazhin që thuhet se i ka dërguar Kombëtares, dekani i pornopolitikës shkruan se “Kënaqësia që do të merrni nga unë, do të jetë më e madhe se vetë shija e fitores me Rumaninë”.

Vazhdon Mjeshtri: “Për shembull ty Xhani, do të të mësoj si t’i ndash në klane çunat dhe t’i vësh në sherre me njëri-tjetrin, pastaj do ndërhysh për të vendosur paqen duke imponuar rregullat e tua. Do kuptosh nga unë, si të ndërtosh dosje për secilin, me përgjime e video, me thënie ndaj njëri-tjetrit, me të bëra e të pabëra, që t’ja tundësh para surratit sa herë hedh vickla”.

Në vijim, pornopolitikani i drejtohet Lorik Canës: “Fitoni, Lorik, dhe unë do të të shpjegoj sesi duke patur vetëm tre-katër shokë e miq, të sundosh mbi 23-shen e ekipit. Mund të caktosh edhe një kapiten falso, që vetëm qesh dhe ndonjëherë trash zërin, por në fakt komandanti do jesh përsëri ti”.

Gojët e Liga mësojnë se pavarësisht mesazhit inkurajues dhe ofertës bujare, pornopolitikani ka vënë bast edhe për fitoren e kombëtares, edhe për humbjen e saj.

“Rëndësi ka të mos humbasësh asnjëherë shijen e fitores”, mësohet se është shprehur kryepushti i politikës.

***

Shënim: Gojët e Liga është rubrikë satirike. Ngjarjet dhe situatat janë të sajuara, mesazhi jo gjithmonë.