BSH, ligj për ndërhyrje të jashtëzakonshme në banka

Nëse sistemi bankar do të ketë probleme Banka e Shqipërisë do të ndërhyjë për planifikimin e rimëkëmbjes së bankave në raste të vështirësive financiare, apo dhe zgjidhjen e bankave me probleme nëpërmjet alternativave më pak të kushtueshme…

Kriza e fundit financiare në nivel global, ka kontribuar në rritjen e kompleksitetit dhe nivelit të rrezikut, veçanërisht në sektorin bankar. Për këtë arsye Banka e Shqipërisë njofton se në kuadër të menaxhimit të krizave dhe harmonizimit të akteve normative kombëtare me kërkesat që burojnë nga Direktiva e re Evropiane “Për Rimëkëmbjen dhe Zgjidhjen e Bankave”, gjatë vitit 2016 do të finalizohet ligji i ri “Për Rimëkëmbjen dhe Ndërhyrjen e Jashtëzakonshme në Banka”, ku një kontribut i rëndësishëm do të ofrohet edhe nga Departamenti i Mbikëqyrjes.

Banka e Shqipërisë thekson se me këtë ligj do të renditet ndër vendet e para në rajon me kuadrin e nevojshëm ligjor dhe me një sërë instrumentesh dhe kompetencash, të cilat do të shërbejnë në drejtim të:

(1) planifikimit të rimëkëmbjes së bankave në raste të vështirësive financiare;
(2) ndërhyrjes në një fazë të hershme në banka në rastet e problematikave të tyre;
(3) zgjidhjen e bankave me probleme nëpërmjet alternativave më pak të kushtueshme për publikun dhe kufizimin e zgjerimit të efekteve negative në sistemin financiar shqiptar.

Aktualisht sistemi bankar shqiptar paraqitet i mirëkapitalizuar dhe likuid. Banka e Shqipërisë njofton se kryen edhe analizat e provës së rezistencës (stress-test) për të matur qëndrueshmërinë e kapitalit të bankës për të përballuar rreziqet e veprimtarisë bankare.

Këto analiza tregojnë se niveli aktual i kapitalit të sistemit bankar është i mjaftueshëm për të përballuar një nivel relativisht të lartë të humbjeve që vijnë si rezultat i ekspozimeve ndaj rrezikut të kredisë.
Kjo aftësi e kapitalit për të përballuar humbjet e mundshme ka qenë konstante përgjatë gjithë vitit 2015./MONITOR