Vargje të nënshkruara,
Gëzim Loka
Nuk ka karare, as limite
Nuk ka respekt, as burrëri
Ato që ndërtuam me vite
Në çast i zhbëmë pa dhembshuri…
I zoti quhet kush mashtron
Kush ia ka tjetrit me t’pabesë
Nga skuta kush tjetrin përgjon
Që tjetri n’lak të tij të mbesë!…
Kush nuk ka turp e dinjitet
Ngrihet në post, ngjitet në krye
Nga lartësitë këmba s’i shket
Dhe mbi të drejtin bënë hije!
Dhe mbi të drejtin ligësia
Ligjin e bën me një mijë forma
Kuptim nuk ka më dashuria
Pushteti është një bandë me horra!
Është kohë e horrave të pacipë
Kohë e rezilëve të jargosur
Në rresht i kanë t’gjitha dredhitë
Dhe në llum vesi janë dreqosur…