SHËNIM: Puçet dhe pushtat që shtiren si idiotë!

Edhe një herë nuk iu ndenj pa bërë provokimin e radhës. Me gjasë, Sali Berisha ishte i bindur se ç’lloj komentesh do t’i vërshonin lumë pas deklaratës së tij fejsbukiste referuar ngjarjeve në Turqi, se grushtet e shtetit marrin përgjigjen e merituar, njësoj si më 21 janar.

E megjithatë ai e hodhi gurin në lumë. Për fat të keq, nuk është një gur që e hedh budallai dhe të tjerët gjëmojnë për ta gjetur; është një gur që e hedh një pusht malinj i politikës dhe autoritarizmit, që shtiret si budalla. E bën për t’u kujtuar të gjithëve se është ende aty, se ka shumë fije në dorë dhe nuk kanë çfarë t’i bëjnë. Madje, i luten e i përgjërohen për t’i dhënë një zgjidhje dhe frymë shprese vendit, qoftë fjala për 97-n, qoftë për zgjedhje presidentësh, qoftë për reforma të rëndësishme si kjo në drejtësi. Është pra, një gur që e hedh një provokator profesionist i cili tek-tuk shtiret si budalla, por që i di mirë punët e veta të zeza. Dhe e shijon acarimin që shkakton.

Dhe “budallai” e di mirë se për ç’grusht shteti mund të flitej më 21 janar 2011, kur njerëz të zemëruar e të frustruar u mblodhën për të protestuar ndaj një qeverisjeje skandaloze, hajdute, arrogante e vrasëse dhe opozita që i thirri në shesh i la në mes të rrugës. E di fare mirë se ku dallon kjo datë nga 14 shtatori 1998, dhe çfarë ka ndodhur në secilin rast.

Por duket se ai që është gati të vrasë direkt për pushtet, apo të vrasë indirekt përmes të tretësh rivalë të tij e më pas t’i bëjë heronj duke çarë dyer qeverish me arkivolet e tyre, nuk e ka për gjë edhe të vrasë e të rivrasë shpirtrat dhe shpresat e njerëzve të thjeshtë. Dhe e dini çfarë? Mirë bën që na ndëshkon e rindëshkon, përderisa mbi portretin e tij është vulosur pandëshkueshmëria…  /DITA