Pse zemërohen ballistët?

Pas botimit të intervistës së 23 qershorit me kryetarin e Ballit Kombëtar, Adriatik Alimadhi, nën titullin “Krimineli Mehmet Shehu arriti deri në tredhjen e ballistëve që të mos shtoheshin” u botua një reagim i kreut të komunistëve, Muharrem Xhafa, si dhe kujtimet e veteranit Shuko Minga, ndërsa pati shumë komente nga lexuesit në internet brenda dhe jashtë vendit. Thashë se me kaq u mbyll ajo histori dhe nuk mendova se do t’i ktheheshim kaq shpejt atij debati për luftën antifashiste nacionalçlirimtare dhe për rolin e ballistëve në atë luftë.

Mirëpo, gjatë ditëve në vijim kam komunikuar disa herë me zotin Alimadhi dhe pashë se ai ishte i nervozuar me reagimet kundër tij, ndërsa i shtohej dëshira për të replikuar me kontestuesit e tij. Fillimisht, më dërgoi me postën elektronike qeleshen apo qylafin karakteristik të ballistëve, pasi nuk kishte mbetur i kënaqur me atë qylafin që disenjatori i gazetës i kishte vënë në kopertinën e gazetës. E kemi stilizuar qylafin, tha Alimadhi, e kemi bërë më të bukur, më bashkëkohor, pasi nuk është thjesht vetëm shqiponja si para 70 e ca vjetësh, por është shtuar edhe emblema e Partisë sonë të lavdishme… I premtova se do ta korrigjojmë shumë shpejt këtë detaj.

Nga ana tjetër, vura re se zoti Alimadhi nuk kishte asnjë lëkundje në qëndrimet e tij. Sikurse do ta vëreni edhe në këtë intervistë, ai thellohet në qëndrimet e tij në mbrojtje të kauzës balliste dhe në sulmet që i bën luftës antifashiste të partizanëve të udhëhequr nga komunistët. Ashtu si në botimin e intervistës së 23 qershorit, ne theksojmë se gazeta ‘DITA’ ndan pikëpamje të kundërta me ato të zotit Alimadhi për luftën antifashiste dhe për dëshmorët.

Bisedoi Xhevdet Shehu

– Zoti Alimadhi, të shikoj të mërzitur. Mos ka të bëjë kjo mërzitje me reagimet ndaj intervistës që ju dhatë para pak ditësh në gazetën ‘DITA”?

– Jo, e keni gabim, nuk jam aspak i mërzitur. I zemëruar mbase. Madje këto reagime të tipit bolshevik, pas intervistës që botova në ‘DITA’ i kam pritur. Pse? Sepse prej këtyre mendjeve të mykura dhe diktatoriale e kam vuajtur familjarisht në sistemin kriminal komunist, me marrje jete, me burgje, persekutime, internime e të tjera, kështu që e prisja dhe nuk ndihem i mërzitur aspak, pavarësisht vulgaritetit të tyre.

Mendoj se, në këto 25 vjet të këtyre proceseve të brishta demokratike, këtyre mendimeve nuk iu ka ndodhur asgjë, ata vazhdojnë të paguhen akoma si veteranë nga taksat e shqiptarëve duke mos qenë të tillë. Kjo është e padrejtë. Shqipërinë ata e kanë drejtuar dhe po e drejtojnë, gjyqësorin, prokurorinë, të gjitha institucionet, fëmijët, nipërit dhe mbesat e tyre janë ende, madje edhe reformën në drejtësi ata po e bëjnë, ky është rrugëtimi i Shqipërisë.

– Në intervistë ju i sulmonit ashpër ish-komunistët dhe luftën e tyre nacionalçlirimtare, madje e mohonit totalisht luftën e tyre, ndaj dhe ata kishin të drejtë të reagonin, apo jo?

– Gjatë gjithë kësaj kohe personalisht kam kuptuar që mendimet e tyre janë nga më të ulëtat dhe shoqëria shqiptare po tallet me ta. Gjithsesi mendoj se duhet kohë, duhet të ishin ndëshkuar krimet e komunizmit dhe të gjithë ata që kryen krime dhe lyen duart me gjak shqiptari duhet të ishin përgjigjur përpara drejtësisë. Duhen ligje demokratike, duhet kulturë demokratike, duhet frymë vëllazërimi, duhet ndërgjegjësim, duhet pjekuri dhe vullnet për t’u kuptuar faji dhe gabimet, por kjo është e vështirë dhe të drejtën askush nuk e pranon lehtë, por ndiej keqardhje për këtë mendësi idiotësh dhe shumë të cekët. Për shkak te kësaj sjelljeje, ne si shqiptarë do vazhdojmë të jemi të ndarë dhe kjo nuk i shërben aspak afrimit midis njëri-tjetrit që ne shqiptarët të jemi të bashkuar dhe të shohim përpara si shoqëri e lirë dhe me mendime demokratike. Mos harroni se sot është epoka e Shqipërisë dhe e shqiptarëve dhe më shumë se kurrë kërkohet bashkim dhe përgjegjësia e përçarjes bie mbi ata që gjithmonë kanë përcjellë frymën antikombëtare. Unë mendoj se kjo e ka një shpjegim, sepse ata nuk kanë ndjenja njerëzore, veprimtaria e tyre është vetëm kriminale…

– Mirëpo ju zoti Alimadhi nuk shfaqni asnjë tolerancë me mendimet e kundërta me ju… Si ta kuptojmë këtë qëndrim tuajin?

– Natyrisht që ne nuk mund të pajtohemi dhe të pranojmë mendimet e kriminelëve komunistë. Ne u kemi lenë kohën që ata të ndërgjegjësoheshin për veprimtarinë e tyre, të ndërgjegjësohen për gënjeshtrat, përbaltjen, historinë, për izolimin e Shqipërisë, për shpifjet, gojën e shthurur mbi Ballin Kombëtar dhe mbi ballistët padrejtësisht. Këtu tregohet niveli shumë i ulët i tyre, në mendësinë e tyre ngelet vetëm dhe vetëm denigrim, shpifje, egërsi, gënjeshtra. Shikoni sa gënjejnë, mendojnë se shqiptarët nuk i kuptojnë, thonë se kemi luftuar në trevat shqiptare dhe e çliruam Kosovën. Është çliruar Kosova? Ç’donin ata atje? Ata, po, vajtën atje dhe vranë atdhetarët më të mëdhenj dhe ia nënshtruan trevat shqiptare Serbisë. E kush janë tani tradhtarët? Balli Kombëtar apo ata? Krimineli nuk kupton, ai mbetet i tillë gjithë jetën, prandaj krimet duhet të ishin ndëshkuar në këto 25 vjet demokraci.

Ata e patën kohën e mjaftueshme që të ndërgjegjësoheshin, ata duhet të ishin ndëshkuar për falsifikim të historisë, ata duhet ta kuptonin vetë dhe të dilnin përpara shoqërisë shqiptare të kërkonin falje mbi këtë shkatërrim qe i bënë kombit shqiptar nga mendësia kriminale e tyre, por mendje mykur ngelën dhe nuk kanë kuptuar asgjë nga liria dhe demokracia dhe nga fryma vëllazërore. Ata fituan për shkak të sinqeritetit vëllazëror që kishte Balli Kombëtar, për ata ne jemi akoma armiq, tradhtarë dhe bashkëpunëtorë, kjo frymë i dëmton shumë proceset e Shqipërisë. Mendoj se ka ardhur koha e respektimit të njeri tjetrit, është koha e mendimeve të lira dhe demokratike dhe jo kjo gjuhë e tyre.

Mos harroni se kjo vjen edhe për faktin sepse shoqëria shqiptare është shkëputur krejtësisht nga ata, nuk i mbështet askush, madje edhe vetë partia socialiste, e cila ka filluar dhe tallet, i përdor ata vetëm për t’iu marrë votat, ata duan vetëm t’iu varësh disa dekorata dhe të nderojnë me grushtin lart. Ata kanë perënduar përgjithmonë, ata do të ngelen mendësia më e urryer e shoqërisë shqiptare, dhe kjo ka për të ndodhur, për këtë atyre iu vjen inat. Më vjen keq por ç’të bëjmë, koha na dha ne të drejtë, ky është rrugëtimi i pastër, i drejtë thellësisht dhe plotësisht kombëtar i Ballit Kombëtar. Sa të ngordhin disa mendje të mykura që hiqen si profesorë, si historianë dhe luftëtarë të mëdhenj atëherë do të shpëtojë Shqipëria dhe shqiptarët njëherë e përgjithmonë…

– Replikën e parë kundër jush e bëri publikisht kreu aktual i komunistëve, Muharrem Xhafa. Si e pritët reagimin e tij?

– Gjallë është ky (Muharremi)? Unë kam thënë dhe vazhdoj të them të drejtën dhe vetëm të vërtetën, gjithçka të mbështetur mbi fakte dhe të dokumentuara, kjo është pranuar edhe vetë prej tyre që këto krime janë kryer nga vetë ata kriminelë.

– Por edhe veteranët ish-partizanë janë zemëruar me intervistën tuaj. Ka të bëjë kjo zemëratë e tyre me faktin se ju goditët dhe i konsideruat kriminelë dy udhëheqësit kryesorë të partizanëve, pra Enver Hoxhën dhe Mehmet Shehun?

– Zotëri, jo vetëm Enver Hoxha dhe Mehmet Shehu, por edhe këta njerëz të shpifur nuk kanë kuptuar asgjë nga veprimet e tyre kriminale dhe diktatoriale, izolimin e Shqipërisë nga bota demokratike, nuk kanë kuptuar asgjë as nga koha e mendimeve të lira demokratike. Unë mendoj se këtij grupimi njerëzish duhet t’i krijojmë kushte për të zhvilluar idetë dhe jetën e tyre, t’u ndërtosh disa objekte, t’i vendosësh të rrinë së bashku dhe të shohin me sytë e tyre si e si do të shembet sistemi i menduar prej tyre, do të hanë njeri-tjetrin, do t’u hyjë krimbi si ajo molla që e gërryen krimbi dhe bie vetë nga pema… Kjo është e gjitha, vetëm atëherë ata do ta kuptojnë, sepse deri tani kanë rrojtur mbi kurrizin dhe djersën e shqiptarëve.

– Me sa kam vënë re, më shumë indinjatë ka ngjallur deklarimi juaj se forcat partizane kanë vrarë “zero italianë dhe gjermanë pushtues” gjatë luftës. A nuk ishte e tepruar ajo deklaratë?

– Unë flas me fakte, ballistët janë shumë seriozë në këtë pikë. Statistikat flasin se nga komunistët janë vrarë vetëm 136 italianë dhe gjermanë. Atëherë, ku është “lufta e famshme e lavdishme” e të tjera…, Ku janë batalionet, brigadat, korparmatat, kaq mijë dhe aq mijë të vrarë? Pastaj kuptoni një gjë që sikur të ishte bërë luftë e vërtetë kundër gjermanëve dhe italianëve, a e kuptoni ju se shqiptarët do ishin vrarë dhe shkatërruar? Kuptoni një gjë se me kë po përballeshin, por kriminelët komunistë e kishin si strategji: hidhnin një pushkë këtu dhe atje dhe bënin sikur luftonin. Ata po, kanë vrarë vëllezërit e tyre shqiptarë. Shikoni statistikat: 136 pushtues të vrarë, (dhe këta janë vrarë për arsye të tjera), kurse shqiptarë janë vrarë 4000-6000. E kuptoni me kë kanë luftuar këta partizanë dhe komunistë kriminelë?

– Zoti Alimadhi, këto janë akuza shumë të rënda dhe duhet të përmbyset historia e Shqipërisë nëse është kështu si thoni ju. Po a keni fakte, a kini dokumente për këto që pohoni?

– Natyrisht që kam. Unë nuk flas qesim. Vetëm komunistët kanë folur e flasin qesim si udhëheqësi i tyre Enver Hoxha. Ne ballistët nacionalistë flasim me fakte dhe dokumente. Unë deklaroj me përgjegjësinë më të madhe se gjithmonë Balli Kombëtar u përpoq me të gjitha format, edhe mbas prishjes së marrëveshjes së Mukjes nga sllavo-komunistët që në Shqipëri të mos ndodhte gjakderdhje, që vëllai të mos vriste vëllanë, që djali të mos vriste babanë. Balli Kombëtar u përpoq t’i edukonte shpirtzinjtë kriminelë komunistë që ata të mos bëheshin elementë të rrezikshëm, por kjo ishte e pamundur. Kriminelët komunistë filluan luftën vëllavrasëse me një egërsi shtazore, ata vranë në të katër anët e Shqipërisë. Po ju m’i botoni këto fakte që unë mund të them tani?

– Po, i botojmë, ashtu si do të botojmë edhe faktet që i kundërshtojnë faktet tuaja, zoti Alimadhi…

– Mirë, atëherë. Do t’u tregoj disa krime të tmerrshme të atyre komunistëve që tani na hiqen se na çliruan Shqipërinë. E filluan në datën 8-9 shtator, të vitit 1943, nga Devolli duke therur me thikë kokat e shqiptarëve Zia Gashin nga Kosova dhe Hadi Kasimatin. Duhet thënë ashtu siç ka ndodhur, këta kriminelë pasi i kanë prerë kokat e tyre janë tallur, duke i gjuajtur me këmbë kokat dhe duke iu thënë “pa çohu Zia dhe çohu Hadi, komandoni ushtarët tuaj trima…” Së bashku me ta ata vranë edhe 4 ballistë të tjerë.

E kështu shpirtzinjtë vazhduan barbarizmat në të katër anët e Shqipërisë, vranë me atentat sekretarin e rinisë të Ballit Kombëtar Hazis Shara. Masakruan në Matjan të Lushnjës 67 ballistë, duke i therur dhe duke iu trazuar zorrët nëpër bark dhe duke nxjerre përjashta organet e brendshme të njeriut. Nuk ishin shqiptarë këta? Vranë në Gjirokastër Rukmedin Dino me katër vetë; tradhtuan çetën e Hysni Lepenicës duke vrarë 36 komandantë çetash. Sërish vranë në Gjirokastër avokat Emin Kokalarin, Tajar Çarçanin, Qemal Bejlerin, Xhaferr Alushin, Sefedin Haderri, Boço Kalon, 70 vjeç, profesor Taro Kalon, Myzafer Shehun me gjithë të birin 15 vjeç… E shikoni sa të pamëshirshëm kanë qenë katilat komunistë në sytë e të birit vrasin babain dhe në sytë e babait vrisnin të birin. Vranë Vasil Shahinin, Dino Maton dhe Hajlo Laton. Shkoni dhe pyesni në fshatin Libohovë të Gjirokastrës. Kriminelët komunistë kanë likuiduar një fshat të tërë, kanë vrarë 109 burra. Njerëz kanë qenë komunistët dhe partizanët? Jo more jo, vetëm kriminelë. Në mënyrë të pabesë krimineli Mehmet Shehu vret në Dunicë të Pogradecit 68 ballistë. Ky kriminel nuk ndjente të ngopur me mish ballisti. Vrau 22 djelmosha në Martanesh. Vazhdojnë kriminelët, sërish në Korçë çeta komuniste e kryesuar nga Agush Gjergjevica masakroi në mënyrën më barbare Bexhet dhe Xhevdet Bulgarecin, u prenë hundët dhe veshët, u nxorën sytë, u thyen krahët… Të pamëshirshmit iu këpusin organet seksuale. Këta mundet të quhen heronj. Në Kavajë kapin dhe vrasin dy djelmoshat Besnik Cano dhe Qeramudin Sulo, i hedhin në një përrua dhe ku u kalb mishi i tyre. Sërish në Korçë ata vrasin Baba Zylfon, Sabri Panaritin, Refat Goskovin me gjithë të birin. Në Tiranë vrasin Azis Camin. E pra të gjithë këta ishin shqiptarë, por tragjedia vëllavrasëse arrin kulmin e saj në përroin e Shipckës në Voskopojë të Korçës, ku zbulohet krimi i radhës, kufomat e shqiptarëve arrijnë në 180 vetë, gjetur pas 3 muajsh të masakruar barbarisht, prerë krahë, këmbë e kokë, mbathur me patkonj kali… Këtyre kriminelëve mund t’u thuhet atdhetar dhe patriot? Vetëm kriminelët silleshin kështu.

Në Tiranë më 14 Nëntor 1944 në hotelin Bristol (sot muzeu Kombëtar) vrasin 14 vetë: Ismail Petrela, tre vëllezërit Kokolari, Lluka Xhumari, Nebil Çika dhe kunati i tij, së bashku me pesë të tjerë. Këto janë disa nga statistikat të cilat tashmë janë të dokumentuara, ka edhe raste të tjera, dhe nga arkivat tona mund të themi me siguri se janë 4000 deri në 6000 shqiptarë, këto krime barbare i kanë kryer komunistët në luftën vëllavrasëse ndaj vëllezërve të tyre shqiptarë në vitet 1943-1944-1945. Po gjatë 50 vjetëve në vazhdim? Veteranë duhet t’u themi këtyre, patriotë duhet t’u themi këtyre, atdhetarë duhet t’u themi këtyre? Vetëm në Shqipëri ndodhin këto gënjeshtra.

– Zoti Alimadhi, ju pyeta pak më parë nëse keni dokumente nga arkivat e vendit apo të huaja që i faktojnë këto krime?

– Ja, po u tregoj njërin prej tyre. Mirë, mua nuk më besojnë. Shikoni këtë dokument të ambasadorit gjerman që mban datën 17 shkurt të vitit 1944, që përshkruan ekzekutimin nga kriminelët komunistë mbi 170 ballistë, në fshatin Shipckë të Korçës. Apo dhe këtu gënjen Balli Kombëtar? Të gjitha krimet barbare të tyre janë të provuara dhe të dokumentuara, kuptoni ju njerëz që ende ne duhet t’u themi këtyre të pashpirtëve që nuk kanë kuptuar akoma, se duhet të kishin kërkuar ndjesë, por vazhdojnë akoma me fyerje dhe banalitete. Unë mund t’u them atyre: kafshojeni gojën dhe rrini urtë, dilni dhe kërkoni falje për gjithçka që i keni bërë Shqipërisë dhe shqiptarëve kërkoni falje publikisht more kriminelë. Keni sy dhe faqe, pale na bëni akoma tradhtarë, të pabesë! Pushoni dhe mbylleni gojën tuaj të shpifur, sepse vetëm prej jush ka vuajtur ky komb i mjerë, pushoni ore të paudhë dhe të pa fe!

– Po për komentuesit anonimë që kanë shkruar për intervistën tuaj kini ndonjë koment?

– I kam lexuar të gjitha me shumë kujdes, edhe ato që më shajnë. Por dua t’u them të gjithëve: Kam dalë shumë i plotë nga babai im i ndjerë, i edukuar me kulturën tradicionale shqiptare. Si familje dhe si fis kemi kontributin tonë në historinë e Shqipërisë, kemi dhënë gjithçka, ia kemi bërë hallall kombit tonë dhe do ta vazhdojmë ta japim sa herë të kërkohet, por, por kjo është demokracia, secili të flasë ashtu siç ai e mendon, kjo është liria e fjalës, kjo e bën edhe gazetën tuaj ‘Dita’ më demokratike që të ketë edhe mendime të ndryshme, pavarësisht banalitetit që shprehin disa. Po këtu bëhet dallimi midis nesh dhe atyre gojë prishurve dhe shpirtzinjve. Ata mendojnë se Shqipëria është vetëm e tyre, nuk ka vend për shqiptarë të tjerë, kurse ne themi se Shqipëria është e të gjithë shqiptarëve pavarësisht nga bindjet, kështu jemi ne dhe ky është dallimi jonë, kjo është e vërteta. Pavarësisht me vonesë, por kam bindjen se sa të mbyllet goja e disa veteranëve e vërteta nuk del në shesh. Sipas ne ballistëve, nuk mund të shkohet më tutje me mendimet e Kristo Frashërit e Dritëro Agollit. Por, edhe sa të hiqet mendësia komuniste e Pandeli Majkos, mendoj se Shqipëria dhe shqiptarët do të shpëtojnë njëherë e përgjithmonë nga kjo ligësi dhe mendësi denigruese dhe e dëmshme për kombin shqiptar.