Meta: PD nuk i votoi tri ligjet, nguli këmbë te referendumi

Kreu i LSI-së sqaron arsyet pse nuk u votuan dje në Parlament tri ligjet e kërkuara nga BE për marrjen e statusit të vendit kandidat. Gjatë një takimi në Bërxull të Tiranës, Meta tha se kryeministri Berisha po e përdor politikisht votimin e tri ligjeve. Sipas tij, pengesa e vërtetë për votimin e ligjeve është Berisha, i cili ka ngulur këmbë në idenë e hedhur disa javë më parë për një referendum për tri ligjet. Meta tha se propozimi i LSI-së drejtuar PS dhe PD ishte që ligjet të votoheshin tani dhe të hynin në fuqi në shtator, me Parlamentin e ri. Por përgjigja e PD-së ka qenë që këto ligje të votoheshin në shtator me referendum. “Nuk ka sens të bësh një referendum për një çështje që mund të zgjidhet në Parlament, kur ekziston mundësia dhe vullneti. Duhet vetëm shpirti i kompromisit dhe i përgjegjshmërisë për të ardhmen e vendit, do të thotë që nuk e ke pasur seriozisht deri tani çështjen e integrimit. Pse duhet të harxhojmë miliona euro për të bërë referendum në të gjithë Shqipërinë, kur asnjë nuk e kundërshton çështjen e miratimit të tri ligjeve”, tha Meta.

Akuzat e Berishës një ditë më parë: Opozita po bën pazare 

Tri ligjet e famshme që interpretohen si kushti për statusin e vendit kandidat në BE nuk u votuan as në seancën e djeshme. Kryeministri Berisha akuzoi opozitën për pazare, të cilat sipas tij penguan votimin e ligjeve. “Ilir Meta ftonte zotin Rama të votojë ligjet, tani fton zotin Berisha. I kërkoj në mënyrë të prerë të mos i shndërrojë ligjet në pazar për lista të zeza në kurriz të mbështetësve të tij. Të vijë këtu sepse kjo botë nuk mund të konceptohet thjesht si pazar. Tani atje është bërë lista e zezë se cilët pranohen dhe cilët jo nga LSI-ja, Nasip (Naço) po të them të vërtetën. Listën e zezë ia ka dorëzuar zoti Rama. Sot u shty votimi si pazar për listën e zezë. Përgjegjësia bie mbi atë që mori peng statusin, pengoi investimet. Unë me padurim prita sot të votonim, por ato mbeten çështje pazaresh dhe pa përfunduar pazaret me njëri-tjetrin nuk do i votojnë. A i patë se si ikën, sikur u kishim futur halorë karriget e tyre. Ikën, por karriget e tyre flasin shumë, marrin për vete një përgjegjësi të rëndë. Pazaret nuk kanë përfunduar, edhe kjo halë do u mbetet në fyt”, tha Berisha.

3 ligjet e integrimit

Pak ditë më parë, kreu i LSI-së, Ilir Meta, bëri thirrje për miratimin e ligjeve, ftesë që u pranua edhe nga kreu i PS-së, Rama. Ndërkohë, të dielën, edhe kreu i maxhorancës qeverisëse, Berisha, tha se tri ligjet do të votohen. Kryetarja e Parlamentit, në një prononcim për mediat dje gjatë pushimit të seancës, akuzoi opozitën për bllokim, ndërsa ftoi deputetët socialistë të votojnë.

“Janë tri ligjet e bllokuara prej mëse 200 ditësh nga PS. Sot jam këtu para qytetarëve shqiptarë me një ftesë ndaj zotit Rama. Tri ligjet janë edhe sot në rendin e ditës. Ftoj zotin Rama të votojmë tri ligjet, edhe pse shumë vonë, ai përsëri sot ka një mundësi për t’i lejuar deputetët që t’i bashkohen maxhorancës për të votuar. Nuk i kërkon Jozefina, i kërkon Brukseli dhe vokacioni perëndimor i shqiptarëve”, tha Topalli.