Vasili sqaron marrëdhëniet mes Metës e Ramës

Kreu i Grupit Parlamentar të LSI-­së, Petrit Vasili u shpreh i bindur se konsensusi i arritur për reformën në drejtësi do vijojë edhe me 7 ligjet.

“Po ecim në një rrugë të re, ka mjaft tabu të rrëzuara, mjaft mure të shembura të moskomunikimit, politika e konceptuar në mënyrë krejt të ndryshme reforma në drejtësi, ndryshimet kushtetuese na imponojnë të ecim në këtë rrugë edhe për 7 ligjet, besoj se do kemi realizim konsensual dhe në kohë”, tha Vasili për News 24.

Lidhur me marrëdhëniet brenda koalicionit qeverisës, Vasili sqaroi se: “Marrëdhënia PS­-LSI është në sytë tuaj, matet me atë çka realizohet në sallën e Kuvendit ku ka konsensus, sigurisht një motivim reciprok për të realizuar punët e shtetit të cilat i bashkërendojmë, korrektësi dhe seriozitet të cilit nuk i shmangemi. Kjo ndërton edhe qëndrimin tonë në koalicion, Sa i takon thashethemeve tendosje, apo ç’tendosje këto nuk janë punët tona”.

 Vasili u shpreh ndër të tjera se shumë punë i presin dy forcat e mazhorances deri në zgjedhjet e ardhshme.

“Ne jemi përpara fillimit të sesionit parlamentar, do miratojmë ligjin e buxhetit, kemi ende shumë punë për të bërë, kemi detyra të mëdha para, pastaj kemi kohë për taktikat elektorale. Kemi edhe implementimin e reformës në drejtësi. Na pret një punë e madhe dhe me përgjegjësi të lartë”,­ shtoi ai i pyetur nëse LSI shkon bashkë me PS në zgjedhjet parlamentare.