Një kompani offshore nga ishujt Virgin merr ARMO-n?

Ionian Refining dhe Trading Co. – IRTC SH.A (IRTC) është kompania që ka marrë në shfrytëzim rafinerinë problematike të naftës, ARMO.

Lajmi është bërë i ditur nga Bankers Petroleum, që deklaroi dje nënshkrimin e një marrëveshjeje të kushtëzuar në tregun vendas me kompaninë në fjalë.

Sipas marrëveshjes, Bankers do të shesë deri në 65% të prodhimit të naftës bruto te IRTC.

Marrëveshja do të bëhet efektive pasi Bankers të marrë miratimin nga Qeveria Shqiptare për programin e propozuar të shpimit të kompanisë për tremujorin e katërt 2016. Si dhe pas respektimit të amendamenteve për procedurat ndërmjet kompanisë dhe Albpetrolit për tërheqjen e pjesës së naftës prodhuar në Patos-Marinzës që i përket Albpetrolit.

Ionian Refining dhe Trading Co, është regjistruar në Qendrën Kombëtare të Biznesit në 13 qershor të vitit 2016. Kompania rezulton e regjistruar offshore në Ishujt Britanikë Virgin, duke vijuar me “traditën” e kompanive më aksionerë të panjohur që hyjnë në aktivitetin e naftës në Shqipëri.

Nga Ministria e Industrisë dhe Energjisë, që ende zotëron 15% të aksioneve të ARMO nuk ka informacion se në çfarë marrëdhënie kontraktuale ka hyrë kjo kompani e re me rafinerinë ARMO dhe si do të veprohet me detyrimet e shumta që ka ARMO.

Rafineria ARMO, është nga kompanitë më problematike në Shqipëri, teksa është kreditori më i madh i vetëm i keq në banka dhe ka një mal me detyrime ndaj shtetit dhe të tretëve.

Në fund të tremujorit të parë të 2016-s, borxhet e kompanisë ARMO në total kanë arritur në 595 milionë dollarë sipas burimeve në Ministrinë e Energjetikës, një shumë kjo që është gati sa 5% e Prodhimit të Brendshëm Bruto të vendit.

Nga totali i detyrimeve afërsisht 300 milionë dollarë janë kredi bankare dhe pjesa tjetër e borxheve ndahet ndërmjet Albpetrol-it, tatim-taksave, të tretëve dhe punonjësve. Vetëm shtetit, ARMO i ka rreth 100 milionë euro.

Punonjësit kanë filluar protestat për mosmarrjen e pagave prej muajsh- raporton Monitor.