Video/ Një surprizë për punonjësin e MAS

Pas 33 vitesh, në të njëjtën zyrë të katit të parë ku filloi punën si redaktor i gazetës Mësuesi, dita e fundit në detyrë e Ilir Kaninit u shoqërua me një surprizë për të.

Dalja në pension e Ilirit ishte qëllimi i vizitës së palajmëruar të kryeministrit Rama në Ministrinë e Arsimit, ku së bashku me ministren e Arsimit dhe kolegë trokitën në derën e zyrës së Ilir Kaninit, Doktor i Shkencave Historike.

“Edhe pse nuk e njihte personalisht, Kryeministri vendosi t’ia uronte vetë Ilirit ditëlindjen, në shenjë respekti e vlerësimi të shembullit të nëpunësit profesionist, korrekt e Ilir Kanini, shembulli i nëpunësit korrekt, të cilët administrata shqiptare i ka të shumtë dhe që Ilir Kanini i përfaqëson” – thuhet në një postim të MAS.

“Si Iliri ka plot njerëz të ndershëm, ka plot familjarë, prindër apo edhe më të rinj, që janë pjesë e administratës, për të bërë me përkushtim detyrën dhe për të fituar me ndershmëri rrogën dhe bukën e përditshme të fëmijëve dhe familjes së tyre”, u shpreh Rama.

Model i nëpunësit të përkushtuar dhe frymëzues e cilësoi edhe ministria e Arsimit, Lindita Nikolli.

“Ka 33 vite që punon në ministrinë e Arsimit, i dedikuar arsimit fillor, i dedikuar revistës Mësuesi. Ka 33 vite që s’ka marrë asnjëherë raport. Një model që do të na shërbejë të gjithëve, mua të parës, por edhe të gjithëve për modelin e thjeshtësisë, profesionalizmit, korrektesës, ndershmërisë”, u shpreh ministrja.

U rrëfyen kujtime e mbresa nga puna e përbashkët, por edhe batuta e dhurata. Një kravatë ishte dhurata e Ramës, e shoqëruar edhe me një batutë: “Unë jam i gjatë, po kravatat janë normale.”