Konservatorët në Kroaci kanë fituar zgjedhjet e parakohshme parlamentare, të mbajtura të dielën, por tani përballen me detyrën e vështirë të formimit të koalicionit qeveritar.
Sipas rezultateve finale, Bashkimi Demokratik i Kroacisë (HDZ) ka siguruar 61 nga 151 vendet e Parlamentit.
Social-Demokratët kanë dalë në vendin e dytë, me 54 vende.
Partia reformatore Most, ndërkaq, ka dalë e treta me 12 vende, por mund të luajë rol vendimtar.
Zgjedhjet e parakohshme janë mbajtur më 11 shtator, pasi qeveria e udhëhequr nga HDZ-ja ka rënë në qershor.
Koalicioni HDZ-Most është prishur pas më pak se gjashtë muajsh në pushtet, për shkak të grindjeve për reformat në administratën publike dhe emërimet qeveritare.
Bashkimi Evropian do që Kroacia, anëtari më i ri i tij, të zbusë borxhin e lartë publik, të ulë deficitin buxhetor, të ristrukturojë administratën publike dhe të përmirësojë klimën e biznesit, me qëllim rritjen e ekonomisë, e cila ende dominohet nga ndërmarrjet shtetërore.