Ku ka qenë Pelioni?

I nderuar lexues!

Pelioni ka qenë qytet ilir në krahinën e dasaretëve pranë lumit Eordai (Devoll i sotëm). Përmendet nga Arriani dhe Rufi si qendër e kryengritjes së krahinave lindore ilire të udhëhequra nga mbreti Klit, kundër sundimit maqedon më 335 p.e.s. I bëri ballë me sukses rrethimit të ushtrisë maqedone të udhëhequr nga Aleksandri i Maqedonisë, i cili në betejën e parë u thye pranë Pelionit. Në sulmin e dytë të befasishëm Aleksandri e detyroi Klitin të braktiste qytetin, pasi e dogji. Tit Livi e përmend sërish më 199 p.e.s. në fushatën e konsullit Sulpici kundër Maqedonisë lindore. Përshkrimi që i bëjnë vendit autorët antikë lejon të mendohet se Pelioni ndodhej aty ku janë sot rrënojat e qytetit ilir pranë fshatit Selcë e Poshtme të Pogradecit.