Kur fushata zgjedhore hapet formalisht pas dy javësh, dhe kur partitë politike vijojnë serinë e takimeve me votuesit, Komisioni Qendror i Zgjedhjeve është mbledhur për të verifikuar listat e kandidatëve të partive politike.
Pas shqyrtimit të listave me emrat e kandidatëve për deputet të zgjedhjeve të 23 Qershorit, Komisioni Qëndror i Zgjedhjeve ka vendosur që Partia Socialiste nuk ka respektuar kriterin gjinor në katër qarqe të vendit. Sipas KQZ-së kriteri gjinor nuk është plotësuar në Elbasan, Durrës,Tiranë dhe Kukës.
Si rrjedhojë KQZ-ja ka vendosur sanksionin administrativ prej 6 milion lekësh për Partinë Socialiste për mosrespektim të kriterit të gjinisë.
Po kështu KQZ-ja ka vendosur që edhe Partia demokratike nuk ka respektuar kriteret gjinore në 4 qarqe të vendit. Sipas KQZ-së kriteri gjinor nga ana e PD-së nuk është plotësuar në Elbasan, Kukës, Dibër dhe Berat.
Në Komisionin Qendror të Zgjedhjeve kanë depozituar lista shumëmërore me kandidatë 66 parti politike, 4 nga të cilat konkurrojnë më vete, ndërsa janë regjistruar edhe 3 kandidatë të pavarur.
Afati i fundit i miratimit të listave me kandidatë është 14 Maji.