Lesh-e-listat zgjedhore, edhe vetë Ministri i Brendshëm me 3 adresa!

Ministri i Brendshëm i Shqipërisë, Flamur Noka, në regjistrin e shtetasve të gjendjes civile rezulton i regjistruar tre herë. Adresa e parë ku ai rezulton i regjistruar është fshati i tij i lindjes, Novosej, në komunën Topojan të Kukësit. Adresa e dytë është në Tiranë, në rrugën “Andon Zako Çajupi” , ndërsa dhe adresa e tretë është sërish në Tiranë në “Rrugën e Durrësit”. Mësohet se vetëm në muajt e fundit Drejtoria e Gjendjes Civile ka mundur të “korrigjojë” këtë tripletë por në thelb prania trefishen regjistrin e Gjendjes Civile të njeriut që sot është në krye të ministrisë së Brendshme dhe përgjegjës për mbarëvajtjen e saktësisë së listës së gjendjes civile dhe listës së votuesve është një tregues kuptimplotë se në çfarë derexheje është infrastruktura zgjedhore në Shqipëri. Përfaqësuesi i Partisë Socialiste në Komisionin Qëndror të Zgjedhjeve, Genci Gjonçaj, deklaroi pak kohë më parë komuna Topojan në Kukës është shtuar më shumë se njësia 11 në Tiranë, që është ndër më të mëdhatë, por edhe me fluksin më të madh të banorëve të rinj. Në të vërtetë është e anasjelltë, ata nga Topojani shkojnë në njësinë 11 në Tiranë. Por Gjonçaj ka harruar të përmendë se komuna Topojan është vendlindja e ministrit të Brendshëm, Flamur Noka.

Dublimet
Ekspertët tanë përfundimisht kanë nxjerrë një shifër prej 25 mijë e 874 shtetas të dyshuar si të dubluar në listat zgjedhore për zgjedhjet e 23 qershorit. Problematika e dytë serioze që lidhet me listën e zgjedhësve ka të bëjë pikërisht me ata zgjedhës që ende figurojnë sot në listën e zgjedhësve pa një adresë një saktë zgjedhore. Ekstrakti i fundit të përbërësve zgjedhore është 352 mijë 337 zgjedhës. Qarku me numrin më të madh të zgjedhësve pa adresë mbetet Tirana, me 87 mijë votues, pasuar nga Vlora me 84 mijë e 178, Shkodra me 38 mijë e 827 dhe Korça me 27 mijë 593 votues. Por një tjetër fenomen i çuditshëm që vërehet në listat zyrtare të zgjedhësve në Shqipëri janë edhe me mijëra persona mbi 100 vjeç që gjenden në këto lista. Në ekstraktin e përbërësve zgjedhorë janë përfshirë një numër tejet i lartë me zgjedhës të moshës mbi 100 vjeç. Gjithsej 1 mijë e 189 zgjedhës. Nga këta zgjedhës 967 janë vendosur në qendra votimi me kodin 8899, (qendër votimi imagjinare për votimin e shtetasve mbi 100 vjeçare, etj.) Këta zgjedhës duhet të votojnë duke paraqitur kërkesë me shkrim. Shtetas mbi 100 vjeç, të përfshirë në qendra votimi të rregullta janë gjithsej 231 raste. Numri masiv i shtetasve mbi moshën 100 vjeçare është dhe një tregues domethënës se listat e shtetasve në Shqipëri nuk përditësohen dhe se strukturat e Ministrisë së Brendshme dhe të Gjendjes Civile kanë vite që nuk kryejnë punën e tyre për verifikimin në terren të kësaj kategorie.

Ferdinant Poni premton “listat e ëndrrave”

“Janë gjeneruar listat përfundimtare në regjistrin kombëtar të gjendjes civile. Është bërë një punë e shkëlqyer për konsolidimin e listës së zgjedhësve”. Kështu ka përmbledhur dhe theksuar zv/ministri i Brendshëm, Ferdinand Poni në një deklaratë të posaçme për listat e zgjedhësve përpara mediave. Me tone shumë optimiste zv/ministri ka shpjeguar në detaje se këtë herë, për zgjedhjet e 23 qershorit, nuk ka asnjë qendër votimi me më shumë se 1 mijë zgjedhës, se 750 zgjedhës mbi 100 vjeç vazhdojnë të jenë të bllokuar, pra që nuk mund të kenë mundësi të votojnë. ” Listat e zgjedhësve hartohen jo më vonë se 40 ditë nga data e zgjedhjeve. Ne e kemi respektuar afatin”, theksoi Poni. Poni ka vlerësuar edhe që, “Ministria e Brendshme është institucioni më serioz, që merret me zgjedhje në Shqipëri”, duke shtuar se “i kemi dhënë seriozitet dhe standarde procesit zgjedhor”.
Pyetjes mbi emrat e dubluar, Poni i është përg-jigjur se “askush nuk mund të votojë dy herë, edhe sikur 100 mijë emra të dubluar të kishim, edhe teorikisht është e pamundur”. Më tej ai ka shpjeguar se çdo shtetas do të votojë me dokument identiteti, të cilin e merr vetëm një herë. Plus kësaj, përdoret gishti me bojë dhe se në sistemin që po implementohet, pasi paraqet dokumentin të del emri në sistem dhe i thonë: “Ti ke votuar një herë, nuk voton dot më”, dha versionin e tij zv/ ministri i Brendshëm mbi përgatitjet zgjedhore.