Lideri i ri i çamëve: Mjaft më me marifete ordinerësh në interesat tona më të larta kombëtare

Mandatet e komunitetit çam në parlamentin e ardhshëm janë cilësuar këto kohë si një nga surprizat e mundshme të 23 qershorit. Me kalimin e Shpëtim Idrizit në listat e PD-së, komuniteti çam është riorganizuar nën drejtimin e Aleancës Popullore, lëvizja politike që drejtohet nga Artur Dojaka – shkruan portali online i gazetws TemA.

Sipas disa sondazheve të fundit, janë të mundura mandate deputetësh të komunitetit çam në Fier e Vlorë, por nuk përjashtohet një luftë e fortë për mandatin e fundit në Tiranë e Elbasan. Kreu i AP-së Artur Dojaka i ftuar në konventën dy ditore të PS-së “Bashkë për një fitore plebishitare që sjell ndryshim rrënjësor” që ka nisur sot në Pallatin e Kongreseve, tha ndër të tjera se “kemi vënë zemrën tonë, mundësitë tona dhe gjithçka tjetër në shërbim të një kauze që është amaneti i shenjtë i të parëve tanë”.

“Ne jemi sot në këtë koalicion sepse besojmë te ndryshimi. Ne duam një Shqipëri më të mirë. Një Shqipëri më të mirë për çamët nuk mund të jetë e tillë pa qenë një Shqipëri më e mirë për të gjithë. Mjaft më me pseudo-kauza dhe pseudo-politikanë që bëjnë sikur përfaqsojnë kauza, por në fakt përfaqësojnë vetëm interesa private meskine.  Mjaft më me marifete dhe falsifikime ordinerësh në çështjet që përfaqësojnë interesat tona më të larta kombëtare – tha Dojaka.

“Deputetët e pas 23 qershorit të Aleancës Popullore ndihen krenarë që ndajnë që sot këto vlera brenda këtij koalicioni gjithëpërfshirës. Ne do na keni krah sa herë do thirren në apel interesat kombëtare të vendit” – u tha të pranishmëve në fjalën përshëndetëse kreu i ri i komunitetit çam.