Ngjarjet në Prezë, kreu i PS: “Kam arsye të dyshoj te kreu i komunës. Hetimi të zbardhë të vërtetën”

“Sulmi i armatosur që m’u bë dje në mëngjes tregon qartë se unë dhe familja ime ndjehemi seriozisht të  rezikuar. Falangat e Sali Berishës janë hedhur në veprim…”. Kështu u shpreh për gazetën “DITA ”, Kryetari i PS-së i Komunës Prezë, Lavdim Kajmaku, pas sulmit të djeshëm më armë zjarri që iu bë banesës së tij. Në të vërtetë është alarmi që ai jep për të dytën herë radhazi, pas një tjetër sulmi në shtëpinë e tij, dy ditë më parë.

Sulme me armë zjarri ndaj familjes Kajmaku ndodh vetëm dy ditë nga zjarri në bizneset dhe banesën e Kajmakut, kur persona të paidentifikuar vunë flakën automjetit të babait të tij dhe një makine që ndodhej e parkuar në oborr. Ndërsa raportohet se dje rreth orës katër të mëngjesit po ashtu është qëlluar me armë zjarri, gjurmët e të cilave kane mbetur në muret e shtëpisë. “Nuk kam asnjë armik personal dhe nuk po e marr vesh se çfarë po ndodh. Këtë çështje unë e lidh vetëm nga arsye politike, sepse jam kryetari i PS-së në Prezë. Për këtë unë akuzoj vetëm një njeri: Kryetarin e komunës së Prezës, Ahmet Halilin”, thotë Kajmaku.

Ekspertët e organit të hetimit kanë kryer këqyrjen në automjete dhe në banesë, ndërkohë që të pranishëm ishin në shtëpinë e Kajmakut edhe deputetët Pandeli Majko dhe Artan Gaçi. “Ne kemi kërkuar mbrojtje për familjen Kajmaku dhe për bizneset e tij, është një gjë e turpshme kjo që ka ndodhur. Policia duhet të priste që të përsëritej rasti? Çfarë duhet të ndodhte, duhet të vriteshin njerëz që policia e shtetit të merrte masa për të mbrojtur qytetarët

e kërcënuar?”, u shpreh deputeti Gaçi. Raportohet se kjo ngjarje së bashku me një sulm tjetër të para dy ditëve, ku biznesi i Kajmakut u shkatërrua nga zjarrvënia, po hetohen nga Drejtoria e Policisë së qarkut Tiranë dhe komisariati numër 6 që mbulon edhe zonën e fshatit Prezë.  Në këtë intervistë kryetari i PS-së, Lavdim Kajmaku thotë që gjithka ka nisur pas një publikimi në DITA

– Zoti Kajmaku, si ndodhi sulmi ndaj familjes suaj?

– Ka ndodhur rreth orës katër të mëngjesit.Një sulm i befasishëm që ka tronditur gjithë Prezën. Është qëlluar me armë zjarri me breshëri në drejtim të shtëpisë sime. Nga policia janë gjetur 9 gëzhoja si dhe gjurmët e plumbave në muret e banesës sime.

– Ju ishit në atë kohë në shtëpi?

– Jo, fatmirësisht nuk isha. Në shtëpi ishin prindërit e mi si dhe xhaxhai me gruan e xhaxhait. Ndërsa unë me familjen isha në një shtëpi tjetër që kam këtu në Prezë. Pra ishte një rastësi që nuk u ndodha aty.

– Kush mendoni se ka qëlluar me armë drejt shtëpisë suaj?

– Tani për tani nuk dihen. Mund të konfirmoj konfirmoj se kanë qenë dy persona dhe unë kërkoj që emrat e tyre të zbardhen sa më shpejt nga policia.

– Ky është sulmi i dytë brenda dy ditësh…

– Po. Pavarësisht se kjo tashmë është bërë publike, po ju tregoj se ndaj të gdhirë para tri ditësh, persona të panjohur u kanë vënë zjarr dy makinave të familjes sime, të babait tim dhe njërës që ndodhej në oborrin e shtëpisë sime. Dje u qëllua me armë zjarri me breshëri në drejtim të shtëpisë sime. Këto sulme nuk janë aspak të rastësishme. Këto sulme tregojnë qartë se unë dhe familja ime ndjehemi të rrezikuar

– Ju flisni për persona të panjohur. Mendoni se ky sulm ka prapavijë politike?

– Po, kështu mendoj, ky sulm ka prapavijë politike. Ka katër ditë që gazeta juaj ‘DITA ’ ka publikuar fakte të rënda për kryetarin e Komunës Prezë, Ahmet Halili. Pas atij publikimi, Halilaj është shprehur në disa raste ditën e botimit të këtij artikulli, se “përgjegjësinë për këtë botim do e mbante Lavdim Kajmaku”. Të nesërmen, shtëpisë dhe dyqanit tim iu vu zjarri. Kjo ndodhi rreth orës 03:00 të mëngjesit, kur unë mora një telefonatë urgjente nga kushërira ime, vajza e xhaxhait. Më tha se kishte rënë zjarr te dyqani dhe te shtëpia. Ajo ishte së

bashku me djalin e saj. Jam nisur menjëherë dhe në fillim jam hutuar pasi nuk e mendoja se do kishte rënë aq shumë zjarr.

– Pra ju mendoni se shkak si për zjarrin në banesë dhe dyqan dhe për sulmin me armë zjarri ndaj jush është kryetari i komunës së Prezës, Ahmet Halili?

– Unë dyshoj shumë se pas këtyre sulmeveai është autori. Unë nuk kam armiq personalë Ose i vetmi që është vedeklaruar si i tillë është Ahmet Halili, sikurse e tregova më sipër. Prandaj dhe kam të drejtë të dyshoj se

sulmet ndaj meje i ka organizuar ai, pra është dora e tij që i ka kurdisur. Ky është një sulm i sinkronizuar dhe i paramenduar shumë mirë ndaj familjes sime me prapavijë të qartë politike. Unë kam bërë kallëzim për këto sulme dhe pres nga organet e hetimit zbardhjen e së vërtetës. Këtë ua shpreha edhe dy deputetëve Pandeli Majko dhe Artan Gaçe që më vizituan sot pas sulmit të armatosur.

– Pse e thoni me kaq bindje këtë?

– E them sepse pas publikimit që i bëtë ju në gazetën ‘DITA ’ të historive të Ahmet Halilaj në SHBA, ai më atakoi mu me emër. Unë kam të drejtë të dyshoj. Hetimi do të zbardhë të vërtetën…

– Ju kini besim se policia do të zbardhë të vërtetën?

– Në fakt unë s’kam hiç besim tek policia dhe organet e hetimit. Sepse ne tani kemi hyrë plotësisht në fushatën për zgjedhjet e 23 qershorit dhe kjo është një luftë politike e mirëfilltë. Falangat e Sali Berishës janë vënë në lëvizje dhe këto janë sulme të dëshpëruara të një pushteti që është duke dhënë shpirt.

– Po në rast se policia nuk e zbardh të vërtetën e këtij krimi?

– E kam menduar edhe këtë, pasi nuk kam besim te policia. Unë jam 120 kile burrë dhe në rast se policia nuk e zbardh të vërtetën dhe të ndëshkojë autorin, unë do të kaloj në vetëgjyqësi. Unë nuk mund ta fal atë kriminel që më vë zjarrin dhe më qëllon me armë zjarri.

A do të lejohet krimi të kthehet në simbol të kësaj fushate?

 Nga Xhevdet Shehu

Ngjarjet në Komunën e Prezës së Tiranës të ditëve të fundit, kur brenda dy ditësh sulmohet kryetari i PS-së së komunës, Lavdim Kajmaku, janë një shenjë mjaft e keqe për fushatën që sapo ka nisur zyrtarisht për zgjedhjet e 23 qershorit. Janë sulme të rënda, të kryera natën ndaj shtëpisë dhe bizneseve të një përfaqësuesi të opozitës. Dje rreth orës katër të mëngjesit shtëpia e kryetarit të PS-së u sulmua edhe me armë zjarri. Sikurse argumentohet nga zoti Kajmaku dhe nga deputetët e opozitës që kanë shkuar në vendngjarje, këto janë sulme me prapavijë politike, ndërsa policia nuk ka arritur ende në ndonjë përfundim mbi të vërtetën. Personi i sulmuar ishte edhe më i drejtpërdrejtë kur tha se këto sulme janë vepër e falangave të pushtetit aktual të Sali Berishës. Të bën përshtypje fakti se nuk kemi asnjë reagim nga Partia Demokratike, ndërsa policia thotë se po punon për zbardhjen e ngjarjes! Gjithçka duket se nisi menjëherë pas publikimit në gazetën ‘DITA ’ të disa fakteve mbi kryetarin demokrat të Komunës së Prezës, Ahmet Halili, gjatë kohës që ai ka qenë në Shtetet e Bashkuara. Halili është shprehur në mjedise publike se “përgjegjësinë për këtë do e mbante Lavdim Kajmaku”, ndaj dhe kryetari i PS-së së komunës dyshon se Halili është dhe njeriu që ka organizuar dy sulmet radhazi kundër tij dhe familjes së tij. Ndaj i kërkon policisë zbardhjen e së vërtetës, që të mos kalojë në vetëgjyqësi. Mirëpo ka edhe afro një muaj fushatë deri më 23 qershor, ku nuk do të mungojnë dhe akuzat për persona konkretë. Pra fusha pritet të nxehet edhe më shumë. Zjarri dhe plumbat mbi shtëpinë e familjes Kajmaku në Prezë janë një ogur i keq. Deputetët socialistë Majko dhe Gaçe u shprehën dje nga Preza se kjo që i ka ndodhur familjes Kajmaku është e turpshme dhe policia duhet të veprojë urgjentisht për të garantuar jetën e qytetarëve. Nëse policia nuk vepron, ndërsa i dëmtuari ka dhënë edhe një pistë hetimi, atëherë kemi të drejtë të mendojmë se kemi të bëjmë me një shtet të inkriminuar dhe si zjarrvënia, ashtu dhe atentati me armë janë të qëllimshme. Janë terror që u bëhet qytetarëve të këtij vendi para verdiktit të rëndësishëm të 23 qershorit. Ne nuk duam ende ta mendojmë këtë, sepse përndryshe do të pranonim dështimin e demokracisë në vend dhe kjo do të na kujtonte skenat e Arturo UIsë së Brehtit.