Një shënim për mitingun e Berishës dje në Dibër

E xhumaja e parafundit e majit e gjeti Saliun në Peshkopi, shoqëruar nga Shehi, Hoxha e të tjerë kandidatë të koalicionit “të ndryshkimit”. Terreni ishte përgatitur. Shkollave, kopshteve, institucioneve, duke filluar nga prefektura, këshilli i qarkut, bashkia, drejtoritë rajonale, përfshirë atë arsimore me të gjitha shkollat, drejtorinë e spitalit, ku kishin lënë nga një infermiere “emergjence” për pavijon, u ishin vënë çelësat e zinj. Kryetarët e njësive vendore kishin përlarë me thupër ”administratat” e tyre modeste. Fëmijët e kopshteve, të gëzuar nga dita e pushimit se “teta edukatoret kishin shkuar te xhaxhi Sali” përplasnin duart e këndonin këngën e fundit që kishin mësuar në kopsht: “ S’po vjen shiu, s’po vjen shiu/ na e sjell xhaxhi Saliu/ le ta dijë e gjithë bota/shiu vjen bashkë me vota/, ndërsa më të rriturit se ata, filloristë, nxënës 9 vjeçareje e të mesmeje, mbanin në duar pak flamuj të dalë boje të PD-së e të legalitetit.

– Po populli ku është? – pyet një dibran i mençur.

– Ai u gëzohet fryteve të punës madhështore të partisë atje në fshat ku Saliu “na ka mbytur me investime” – ironizon tjetri.

E nisi vizitën e tij në gjimnazin e qytetit. Pas kontrollit në trup e xhep të të gjithë mësuesve të shkollës , pas nuhatjes së qenve antiminë, rruga ishte e lirë që Saliu të priste për herë të tretë shiritin e gjimnazit të Peshkopisë, pasi ndofta nuk i ka pëlqyer stili i prerjes së dytë që i bëri shiritit muaj më parë zëvendësi i tij dhe njëkohësisht Ministër i Arsimit e Shkencës, zoti Myqerem Tafaj, prerje e përurim ky që u trumbetua  me bujë nga të gjitha mediat proqeveritare. Në oborrin me më pak se 200 metra katror ( aq i vogël sa maturantët kanë vendosur ta bëjnë aktivitetin e tyre të maturës në oborrin e ish-gjimnazit që “ia ka rrëmbyer” fakultetit), Saliu (që nuk bën politikë në shkolla) u uroi nxënësve të shkollës ta gëzojnë atë, u tha se “kishte bërë namin” me investime për arsimin dhe më pas “o burra të shajmë kryetarin e opozitës). Fjalët e tij për Edi Ramën nuk ka nevojë të shënohen pasi duke e dëgjuar dhe padashje në televizion të gjithë i kanë mësuar përmendësh.

Më pas Berisha me shpurën i drejtohet sheshit para shkollës së mesme profesinoale, nga ku janw hequr me fshesw makinat e pwrditshme, për të prezantuar kandidatët. Skenari i PD lokale kishte menduar të fshehë fëmijët që përbënin mbi 50% të sheshit, duke vënë në rresht të parë punonjës e punonjëse të prefekturës, qarkut e bashkisë, mësuese e edukatore. U ngjitën në tribunë duke nisur nga fundi i listës në fillim kandidatët e PD-së. I pari fjalën e mori Sherefedin Shehu, deputet aktual e kandidat për deputet i cili, ndonëse sheh, harroi se gënjeshtra dënohet nga feja dhe hapi thesin e saj . Fjalitë e tij pa kuptim të tipit “Sot keni dëgjuar si kemi ndërtuar një Shqipëri të lulëzuar” humbnin në zhurmën e turmës që dukej hapur se nuk e kishte mendjente Ai, por gjetiu.

Nga thesi i Nastradinit nxorën kokën gënjeshtrat të tipit: kemi ndërtuar 775 kilometra rrugë në Dibër, është rritur punësimi, janë ngritur 75 biznese të reja, janë punësuar 2000 veta, fermerët kanë dalë në treg, janë bërë investime në monumentet e kulturës. Më pas harron se ç’ka thënë e i fut “pufkën” që në qarkun e Dibrës, nën udhëheqjen e PD-së,  janë hapur 7600 vende të reja pune dhe më “bombastikja “u premton dibranëve vende pune në Evropë. Edhe Shehi nuk harron “ t’i turret Edi Ramës” duke sjellë në kujtesë historinë e dalë boje të tre ligjeve. Pas Shehit, e merr fjalën Hoxha (Bedriu), i cili “me lotë mbi letër” qau e qau e kush lotët nuk ia thau se “e paska fyer” Edi Rama si mësues që ka qenë”. I treti, Roland Keta, nuk bëri mirë që u tha dibranëve se Rruga e Arbrit po ecën me hapa të shpejta (dibranët e dinë mirëfilli si thuret e shthuret çorapeja e Rrugës së Arbrit) dhe se atë e bën vetë Saliu se vetë Saliu më pas do ta përgënjeshtronte Landin. Kur shumë kush priste ta merrte fjalën i katërti, Ekrem Spahia i PLL,  kjo nuk ndodhi. Ndofta Berisha deshi t’ua lehtësonte punën dibranëve, t’u thotë atyre se ne për tre luftojmë. Flamujt e Legalitetit ikën nga sheshi duke u valëvitur inatçorë nëpër rugët e qytetit.

Më pas nën një dyzinë britmash paksa histerike e me fishkëllima kalamajsh, në tribunë doli Saliu, si gjithmonë i painformuar nga të vetët për Dibrën. Që në fjalinë e parë “Të nderuar banorë të rrethit të Peshkopisë “ai tregoi se nuk di asgjë, se nuk di që Peshkopia është qytet e jo rreth, rrethi nëse duhet të vazhdojë të përdoret si term quhet “Dibër”. Më pas përsëri “gafa gjeografike”. Thotë kemi ndërtuar rrugë nga Librazhdi në Kala të Dodës e nga Ura e Matit në Sllovë” e askush nuk është kujtuar ta mësojë se Librazhdi është në tjetër qark, se qarku i Dibrës nuk fillon te Ura e Matit, por te Ura e Skurajt dhjetra kilometra më larg, se Sllova vërtet duhej përmendur se është vendlindja e Sherefedinit, por ajo është në të njëjtin aks me Kalanë e Dodës, pa shkuar në Sllovë , nuk mund të shkosh në Kala.

Edhe kryeministri i këtij vendi ka “thesin e vet” për të hapur. U thotë dibranëve që ai ka ndërtuar 92 shkolla , ka subvencionuar 2600 fermerë, janë mbjellë 2400 hektarë tokë…

U foli dibranëve dhe për Rrugën e Arbrit. Këtë herë ndryshoi stil. Nuk u tha se për mos realizimin e kësaj rruge, premtuar për të përfunduar plotësisht në vitin 2011, e ka penguar opozita, por u tregua “shumë i sinqertë” dhe u tha “ një sekret” se për ndërtimin e kësaj rruge paska penguar një problem gjeologjik në Tunelin e Murrizit (se mos e dinë nxënësit e shkollave në shesh se për këtë rrugë është bërë studimi i fizibilitetit, studimi gjeologjik e tw gjitha studimet e tjera para se të fillojnë punimet apo mos ishte i detyruar ai të sqaronte se pse këtë problem nuk e kanë konstatuar më parë e nuk e kanë bërë publik, por kanë thënë e stërthënë që na pengon opozita). U premtoi se do ta ndërtojë në dy vjeçarin e parë tunelin dhe rrugën së bashku me Boshtin e Jugut ( Berisha ka kohë që ecën me plane 2 vjeçare, kështu tha për Rrugën e Arbërit në vitin 2009 “do ta ndërtoj në dyvjecarin e parë në vitin 2011). Më pas u tregoi të punësuarve e fëmijëve një histori, që e dinë dhe fëmijët mbi 6 vjeç, se si një mik i paska thënë se Dibra paska qenë Universiteti i tij  dhe i premtoi Dibrës një Universitet, ndofta një tjetër nga ai që ka premtuar në vitin 2011. Iku Saliu, nuk filloi shiu, ndaj dhe bereqeti i tij në Dibër, zor se do t’ia mbushë një trastë.