Afera ‘Dardania’, UÇK dhe dekoruesi i z.Basha, sot kryeministër i Kosovës

Mediet kosovare kanë njoftuar në dhjetor të vitit të kaluar se një grup bashkëthemeluesish të fondeve për ndihmën e Kosovës i kanë dërguar në letër kryeprokurorit shqiptar Adriatik Llalla për hetimin e shitjes së Bankës “Dardania” e themeluar nga qeveria në ekzil e Kosovës në Shqipëri në vitin 1993.

“DITA” ka ndjekur këtë shqetësim dhe ka mundur të sigurojë dokumentet dhe aktet ligjore të shitjes së kësaj banke.

Le ta nisim historinë nga e para.  Në vitin 1993 në Tiranë themelohet “Banka Dardania”. Kjo ishte një bankë kapitali i së cilës në statut ishte regjistruar si kapital në pronësi të qeverisë së Kosovës. Aksionarë të kësaj banke ishin 9 fonde kursimi të krijuara në 9 shtete të Evropës (Gjermani, Austri, Luksemburg, Danimarkë, Francë, Zvicër, Suedi etj) me qëllim mbledhjen e kontributit prej 3 % nga emigrantët kosovarë për ti shkuar në ndihmë qeverisë së Kosovës.

Nga një vështrim i akteve ligjore duket se çdo gjë ka shkuar normalisht dhe fondet janë vjelë rregullisht. Madje deri në vitin 1999 kur u çlirua Kosova, banka “Dardania” zotëronte një kapital të konsiderueshëm për kohën dhe vazhdoi aktivitetin e saj edhe pas çlirimit të Kosovës, duke pësuar madje një shtim të kapitalit themeltar deri në 5 milionë euro (700 milionë lekë) në vitin  2002. Kryeministri në ekzil i Kosovës Bujar Bukoshi, nga ana e tij ishte aksionar në këtë bankë duke qenë se   ishte drejtuesi i “Fondit të Gjermanisë”.

Kryetar i Asamblesë së Bankës dhe një ndër aksionarët kryesorë nuk ka qenë as më shumë e as më pas se sa Isa Mustafa, ndoshta njeriu më i besuar i Bukoshit, sot kryeministër i Kosovës. Në vitin 2002 kjo bankë duket se ka pësuar një zhvillim domethënës.

Statuti
Dokumentet ligjore tregojnë se më datën 19 Tetor 2002 është vendosur ndryshimi i Nenit 59 të Statutit të kësaj banke. Ky nen përcaktonte se pronare e kësaj banke ishte qeveria e shtetit të Kosovës. Por pas ndryshimit të statutit, ndryshoi pronësia. Në vendimin në fjalë antarët e Asamblesë kanë arsyetuar se përderisa Kosova ende nuk ka një qeveri të sajën sovrane atëherë deri në realizimin e një qeverie sovrane, do të ndryshojë pronësia mbi bankën dhe pronarë të bankës do të bëhen 9 fondet aksionere. (më parë këto fonde kishin të sqaruar në mënyrë të qartë statusin e tyre si fonde aksionere por jo pronare të Bankës “Dardania”).

Pas ndryshimit të statutit duket se 9 fondet e shpërndara në Evropë, kanë fituar “imunitet” nga obligimi për të qenë në pronësi të qeverisë së Kosovës dhe kryeqëndra e këtyre fondeve , nyja që i lidhte të gjitha, pra “Banka Dardania” me këtë ndryshim në statut, kaloi nga një aktivitet mirëfilli shtetëror (për llogari të qeverisë së Kosovës) në një aktivitet privat.

Përfituesit

Fill pas këtij ndryshimi thelbësor në statutin e Bankës në vitin 2002, duket se u hap rruga për shitjen e kësaj banke dhe përfitimin e të ardhurave nga individë privatë e jo shtetërorë. Banka u shit në vitin 2005, një grupi italian investimesh në vlerën e 5 milionë eurove.

Si shitës firmosi vetë Bujar Bukoshi ish-kryeministri në ekzil i Kosovës.  Por përpara se të firmoste këtë kontratë, Bukoshi kishte “larë hesapet” me aksionarët e tjerë të kësaj banke disa muaj më parë. Aktet ligjore të depozituara në gjykatë tregojnë se Bukoshi nëpërmjet “Fondit të Gjermanisë” të cilin e kontrollonte dhe e kishte në pronësinë e tij, ka përthithur të gjitha aksionet që zotëroheshin nga 8 fondet e tjera të shpërndara nëpër Evropë.

Përthithja e aksioneve është bërë me kontrata të rregullta dhurimi ose transferimi të aksioneve nga përfaqësuesit e fondeve të tjera.  Të gjitha këto kontrata janë lidhur në një hark shumë të shkurtër kohor, përpara privatizimit të “Bankës”. Më pas, banka “Dardania” rezulton se është bërë 100 përqind pronë e “Fondit të Gjermanisë”, ndërsa këtë fond e kishte në pronësi individuale direkte vetë Bujar Bukoshi.

Kelmendi: Lulzim Basha është hartues i dosjes së trafikut të organeve

Lulzim Basha u dekorua, si qytetar nderi i komunës së Prishtinës në qershor 2013. Me këtë rast zoti Basha mbajti dhe një fjalim të rastit, por pak më vonë një gazetar e pyeti atë në lidhje me “dosjet e EULEX” për ushtarët dhe komandantët e UÇK-së të arrestuar së fundmi.

Në mënyrë surprizë, zoti Basha jo vetëm që nuk mohoi përfshirjen e tij në hartimin e këtyre dosjeve, por shkoi dhe më tej duke pretenduar se ishte një e vërtetë e pamohueshme fakti që ka pasur krime lufte nga UÇK-ja, por që sipas tij kjo gjë nuk duhej kurrsesi të hidhte baltë mbi luftën për liri të UÇK-së.

Ky reagim i zotit Basha ka ngjallur dhe reagimet e shumë mbështetësve të UÇK-së në Kosovë. Në atë kohë një grup ish-luftëtarësh ishin në grevë urie si reagim proteste ndaj arrestimeve. Një prej grevistëve, Ibrahim Kelmendi, dërgoi në “DITA”-s një reagim në lidhje me këtë deklaratë të zotit Basha duke hedhur akuza të forta ndaj tij.  “Për atë që kupton, ai ndoshta pavetëdijshëm pranoi se nuk ishte i angazhuar vetëm si përkthyes.

Por do të ishte interesant të na informonte nëse ka mbajt mend të jetë angazhuar për hetim të ndonjë krimi serb në Kosovë. Ai ka qenë bashkëpunëtor edhe i Marucio Salustros, tani prokuror famëkeq në kuadër të EULEX-it, për të sajuar edhe dosjen e ‘tregtimit me organe’, – është shprehur Kelmendi.

Dekoruesi

Por Kelmendi ndër të tjera në letrën e vetë ka nënvizuar dhe marrëdhënien e “veçantë” mes bashës si qytetar i sapo dekoruar nderi dhe ish0kreut të Bashkisë së Prishtinës, prej disa ditësh kryeministër i Kosovës, Isa Mustafa. Kelmendi e implikon Mustafën në aferën e privatizimit të “Bankës Dardania” së bashku me Bujar Bukoshin. Kjo bankë u krijua nga fondet e diasporës kosovare për të mbështetur rezistencën.

“Mua më irritoi truku i Lulëzim Bashës në vlugun e fushatës zgjedhore në Shqipëri. Ai duhet të ketë detyruar kryetarin e Komunës së Prishtinës, Isa Mustafën, që t’i jep çmimin “qytetar nderi i Komunës së Prishtinës”, sepse Tirana zyrtare ka në kasaforta dosjen e “Dardania Bank” në Tiranë, bankë ajo “private” e Isa Mustafës dhe Bujar Bukoshit.

Përmes asaj banke këta dy vjedhës të mëdhenj kanë kamufluar hajnin e ndihmave të emigracionit përmes fondit të “3-përqindëshit”. Bëhet fjalë për qindra milionë euro. Lulëzim Basha dhe eprori i tij do të ndihmonin Kosovën nëse do të dorëzonin kopjen e asaj dosje në Krye-Prokurori të Kosovës”, – është shprehur Kelmendi në letrën e tij që ndodhet në arkivin e DITA-s..

Letra e Ibrahim Kelmendit:

Islamikët e kanë një moto mashtruese për të përfituar sa më shumë besimtarë: “Vetëm një ore para vdekjes nëse thua shahadetin, vdes mysliman dhe Allahu t’i fal keqbërjet gjatë gjithë jetës.” Megjithatë, z. Lulëzim Basha nuk duket se është penduar për angazhimin e tij në formulim të dosjeve hetuese kundër “krimeve” të UÇK-së. Në mes tjerash ai tha në Prishtinë: “Ka pasur krime lufte, ka pasur një punë për t’i evidentuar ato dhe unë ndjehem krenar që kam qenë pjesë e kësaj përpjekje”. Për atë që kupton, ai ndoshta pavetëdijshëm pranoi se nuk ishte i angazhuar vetëm si përkthyes. Por do të ishte interesant të na informonte nëse ka mbajt mend të jetë angazhuar për hetim të ndonjë krimi serb në Kosovë. Ai ka qenë bashkëpunëtor edhe i Marucio Salustros, tani prokuror famëkeq në kuadër të EULEX-it, për të sajuar edhe dosjen e “tregtimit me organe”.

Mua më irritoi truku i Lulëzim Bashës në vlugun e fushatës zgjedhore në Shqipëri. Ai duhet të ketë detyruar kryetarin e Komunës së Prishtinës, Isa Mustafën, që t’i jep çmimin “qytetar nderi i Komunës së Prishtinës”, sepse Tirana zyrtare ka në kasaforta dosjen e “Dardania Bank” në Tiranë, bankë ajo “private” e Isa Mustafës dhe Bujar Bukoshit. Përmes asaj banke këta dy vjedhës të mëdhenj kanë kamufluar hajnin e ndihmave të emigracionit përmes fondit të “3-përqindëshit”. Bëhet fjalë për qindra milionë euro. Lulëzim Basha dhe eprori i tij do të ndihmonin Kosovën nëse do të dorëzonin kopjen e asaj dosje në Krye-Prokurori të Kosovës.

Për shkak të angazhimit të stafit të “specialistëve” të Tiranës, për të sajuar dosje të “krimeve” të UÇK-së, Zonja Argita Berisha-Maltezi duhet ta ketë detyruar Babain e saj, që gjithë atë staf ta vendos në pozicione kyçe të pushtetit në Shqipëri…