Vargjet e Arben Dukës!

Përpara Partizanë!

1. A ju ka shkuar në mendje,
për prejardhjen e sloganit,
duke se ajo na vjen,
që nga kohë e partizanit!

2. Saliu thërret :”Përpara”,
dhe gjithë kundërshtarët,
ne direkt na shkon në mendje,
thirrja:”Para Partizanë!”

3. Tash mendoni një ballist,
i pushtuar krejt nga gara,
që të tjerëve rrotull tij,
u thotë:” O ballistë përpara!”

4. S’e kishim menduar kurrë,
po kjo botë është jallane,
të hidhej “Balli” në luftë,
me ca thirrje partizane!

5. Dhe armikja më e madhe.
e Heronjve të shkodranëve,
do gjëmojë në fushatë,
me thirrjen e partizanëve!

6. Përpara do thotë Idrizi,
dhe Xhuveli me Dogjanë,
Saliu jo pa qëllim,
i ktheu në partizanë!

7.Përpara do të thotë Ndoka,
dhe Nikolla ka të ngjarë,
përpara se partizanët,
gjithnjë dilnin fitimtarë!

8. Partizanët dhe dëshmorët,
pa dyshim janë shokët tanë,
po Saliu na “e vodhi”,
thirrjen :”Para partizanë!”.

9. Ja kuptoj hallin e mundit,
vetëm zonjës Jozefinë,
se Sala në fund të fundit,
është kthyer në origjinë!

10. U kthye në origjinë,
fill në rrugën nga është nisur,
unë Berishën do ta quaj,
partizan i arratisur!

11. Partizan i arratisur,
futur tek “armiqtë” tanë,
po që kurrë s’e harroi,
thirrjen “ Para partizanë!”

12. Këtë thirrje e ka thënë,
i pari shoku Enver,
po frymëzimet Saliu,
nga Komandanti i merr!

13. Nuk e di-kallaballëkun,
e gënjen a s’e gënjen,
po Sala partizanllëkun,
që aherë e ka në gen!

14. Që aherë e ka në gen,
dhe koha dot s’ja ka fshirë,
po kostumi i partizanit,
Saliut nuk i rri mirë!

15. Përpara kudo dëgjon,
si partizanët kanë thirrur,
por Sala dot s’frymëzon,
se e ka zërin të ngjirur!

16. Se e ka zërin të ngjirur,
më të shuar për çdo ditë,
thirrja :” Para partizanë!”,
tani Salës më s’i ngjit!