“FALEMINDERIT” ZOTI MOORE!

“Jo shumë kohë më parë Amerika kishte mbështetur regjime shtypëse që kishin shkelur në mënyrë të tmerrshme të drejtat e njeriut, mjaft që të ishin antikomuniste”

Bill Clinton- “Jeta Ime”

Faleminderit zoti Moor që, brenda një muaji, erdhët dy herë në Shqipëri, dhe, megjithatë, ne nuk morëm vesh pse erdhe.

Shumë faleminderit që, me rastin e ardhjes tuaj në Shqipëri, mundët të takonit edhe Islamin dhe Selamin, dy shëmbëlltyrat më të qarta të Lej Fenit modern shqiptar në fushën e politikës.

Ju falënderoj shumë që i këshilluat qytetarët shqiptarë të respektojnë rezultatin e zgjedhjeve (sido që të nxirret ai) dhe nuk e patë të arsyeshme të këshillonit ata që “ia kanë hequr popullit shqiptar mundësinë të ndërrojë lirisht qeverinë e vet” (sipas State Department Country Reports- 2012) apo kryeministrin e vendit, i cili ishte “kreu i trukimit të zgjedhjeve” (sipas korrespondencës diplomatike amerikane të vitit 2009, zbuluar nga Wikileaks). Nëse shqiptarët diskutojnë gjithë ditën kafeneve dallimin e thellë të qëndrimeve të shkruara të Departamentit të Shtetit me këshillën tuaj, mos na e vini re, se jemi popull që na pëlqen humori në kohë të vështira.

Faleminderit që na treguat se, përveç KQZ, ka edhe Kolegj Zgjedhor, (nuk na kishte shkuar mendja për këtë).

Shumë faleminderit që na pohuat se qeveria juaj nuk mund të jetë në një kurs përplasjeje me qeverinë tonë, e cila ka dhunuar tri palë zgjedhje politike dhe ka vrarë katër qytetarë të pafajshëm që protestonin kundër saj, dhe se “…e vetmja përplasje me SHBA do të ndodhë nëse dikush do të zgjedhë të përdorë dhunën në vend të mekanizmave ligjorë”. Pohimi juaj na qetësoi, se pak ditë më parë kishim dëgjuar ambasadorin e SHBA, Aleksandër Arvizu, të thoshte të kundërtën, por tani jemi të sigurt në drejtësinë e konkluzionit të kryeministrit tonë, se ambasadori ka “agjendë personale”. U bindëm edhe se përfaqësues i Presidentit Obama nuk është ambasadori Arvizu, siç kemi dëgjuar shpesh të thuhet nga zyrtarë amerikanë, por  ju.

Ju falënderoj shumë që, me ato që thatë, na dëshmuat se parimet janë për t’u propaganduar dhe paratë për t’u përdorur dhe, njëkohësisht, më sollët ndërmend Francis Becon, që thoshte se “Paraja është një shërbyes i mirë, por një këshilltar i keq”.

Një falenderim të veçantë meritoni edhe për faktin se me qëndrimin tuaj më ndihmuat të verifikoj disa dije që i kam marrë në rininë time. Tani nuk kam më kurrfarë iluzionesh.

Dhe, më në fund, ju falënderoj për humorin që na sollët në këtë klimë tensioni politik, ashtu si zoti Eugen Volfarth, i cili na mësoi ne shqiptarëve pak kohë më parë se një gjykatë speciale administrative (KQZ) mund të funksionojë edhe me gjysmën e anëtarëve.

Prandaj, ju ftoj të vini përsëri pak para zgjedhjeve, që të kemi mundësi ta kalojmë me humor të keqen e përsëritur, nga ne vetë dhe kundër vetes tonë. Por, edhe me bekimin tuaj.