Seancë e jashtëzakonshme, Rama: Të shkarkohet kreu i KQZ

Kryeministri Edi Rama i ka dërguar një kërkesë Kuvendit për zhvillimin e një sesioni të jashtëzakonshëm pas marrëveshjes së arritur mazhorancë-opozitë.

Duke iu referuar kuadrit ligjor, Rama i drejtohet Kuvendit për të zhvilluar këtë seancë ditën e hënë, më datë 22 maj 2017, në orën 18.00.

Në seancën e jashtëzakonshme pritet që opozita të propozojë anëtarët e saj në komisionet e vetingut, si edhe ndryshimet në Kodin Zgjedhor që parashikojnë regjistrimin e PD-së në zgjedhje dhe të listave të saj të kandidatëve.

Gjithashtu në këtë seancë do të shqyrtohen edhe ministrat teknikë.

NJOFTIMI I KUVENDIT

Për Kërkesën e Kryeministrit për mbledhjen e Kuvendit për zhvillimin e një sesioni të jashtëzakonshëm

Bazuar në nenin 74 të Kushtetutës dhe në nenin 42 të Rregullores së Kuvendit, Kryeministri i Republikës së Shqipërisë z. Edi Rama, i ka drejtuar Kuvendit një kërkesë të motivuar me shkrim për thirrjen e Kuvendit në sesion të jashtëzakonshëm.

Kërkesa ka përcaktuar që thirrja e Kuvendit në sesion të jashtëzakonshëm të zhvillohet ditën e hënë, më datë 22 maj 2017, në orën 18.00.

Rendi i ditës i seancës plenare do të përmbajë diskutimin dhe votimin e çështjeve për vënien në zbatim të Marrëveshjes Politike të datës 18 maj 2017, lidhur me:

– Votimin e dekreteve të Presidentit të Republikës për lirim dhe emërim të zëvendëskryeministrit dhe të 6 ministrave;

– Shqyrtimin dhe miratimin e paketës ligjore që ka lidhje me reformën zgjedhore;

– Miratimin e anëtarëve të pakicës parlamentare në 3 komisionet ad hoc të vettingut, si dhe caktimin e zëvendësuesve;

– Zgjedhjen e Kryetarit dhe një anëtari të KQZ-së.