Rama në Kamëz: Berisha ju ka parë thjesht si zgjedhës, jo si njerëz

Kryesocialisti Rama ka zhvilluar sot një takim me banorë të Kamzës. Gjatë bashkëbisedimit, Rama tha se Berisha po fut ‘thikën e ndasisë’ mes veriorëve dhe jugorëve, duke u bërë thirrje atyre që në 23 qershor, kur t’u drejtohen kutive të votimit të mendojnë në radhë të parë për familjen e tyre.

“Saliu nuk e përdor votën tuaj për t’iu ndihmuar, por për të futur ‘thikën e ndasisë’, duke shpikur se unë kam thënë shpellarë, ai nuk iu do, të gjitha gënjeshtra. Mirë ju, por fëmijët tuaj çfarë faji kanë që jeni në këtë gjendje. Kjo është pyetja që kam unë për ata që janë prindër dhe votojnë qorrasi, për Saliun, dhe PD një parti familjare që punon ditë e natë për vete. Që mori përdore fëmijët tuaj dhe i nxori analfabete funksionalë, siç thotë Banka Botërore jo unë. Lërini historitë, jo jemi nga veriu, jo nga jugu të djathtë jo të majtë, bëhuni me familjen tuaj, bëhuni me interesin e komunitetit tuaj dhe atdheun tuaj”, u shpreh Rama.

Ai u ndal në çështjen e legalizimeve, një premtim i pambajtur i qeverisë.
“Ku i keni legalizimet? Letrat i keni se ua kanë dhënë Shabani tapitë sa herë vijnë fushatat. Ku e keni dokumentin se jeni pronarë të kapitalit që keni investuar. Nuk e keni sepse as nuk ka ndërmend t’ua japë njeri”, pyeti Rama banorët. “Nëse e doni ta mbani Saliun me antiplumb në qafë mbajeni. Nuk ju futini Saliu në NATO e bëri SHBA. Saliu e vonoi NATO. Çfarë bëri për ju një gjë konkret. Për Saliun ju nuk jeni njerëz, por vetëm zgjedhës. Dhe zgjedhës do thotë t’i rrejmë sa të mundemi t’i marrim votën dhe të shohim çfarë mund të bëjmë. Vota duhet të jetë e kthjellët. Nuk u them demokratëve bëhuni socialistë. PD është pasuri kombëtare që për momentin ka rënë në duart më të këqija, do të thonte Haveli, heroi më i madh që mundi komunistin. Sipas tij komunisti më i keq është komunisti antikomunist. Tesera e partisë është tjetër gjë, vota është tjetër gjë”, tha Rama.

Kreu i PS-së  shtoi se dy dështimet më të mëdha të qeverisë “Berisha” janë sistemi arsimor dhe ai shëndetësor, për të cilat PS-ja ka një strategji të qartë.
“Pas pabesisë së madhe që i bëri me piramidat, një ditë të bukur tha Sudja nga penxherja fajin e ka kompetenti, s’ka lek më. Pabesia tjetër është e universiteteve. Sot kemi numrin më të madh të juristëve për metër katror”, tha Rama.

“Këtu nuk është betejë do fitojë Sala apo Rama. Por betejë nëse do fitojë rrënimi apo rilindja. Do fitosh ti si person me ekonominë familjare, apo si tifoz. Nuk luhet me top këtu, por me fatin. Pa punë, pa bukë dhe rroftë Sala…ky nuk është tifozllik, kjo nuk është skuadër futbolli”, tha Rama.

Rama: Nuk do të lejojmë më që dera e spitalit t’i përplaset kujt s’ka para

Gjatë një takimi me banorët e Tepelenës mbrëmë, kreu i PS-së, Edi Rama, tha se me ardhjen në pushtet, qeveria e re e pas 23 qershorit do të jetë në krah të tyre. Rama tha se do të jetë pranë qytetarëve të thjeshtë që duan të dalin nga varfëria e papunësia.

“U tha shqiptarëve se do të sillte kokën e Ali Pashë Tepelenës nga Turqia në Shqipëri, në fakt i uli kokën Tepelenës Përmetit Gjirokastrës duke mos ia ndërtuar kurrë rrugën që merituan, prandaj Tepelena, Përmeti Gjirokastra do ia heqë kokën pushtetit të korrupsionit dhe një grushti njerëzish që varfëroi tërë popullin shqiptar për tu pasuruar për vete. Vota juaj do shkojmë tek numri i bekuar 29 për të çliruar Shqipërinë e marrë peng dhe t’i hapim rrugën rilindjes që duam. Ju zotohem se nuk do harroj kurrë këtë pritje të jashtëzakonshme. Nuk do ju tradhtoj kurrë dhe hallet tuaja do jenë hallet e mia, dhe në përpjekje për të dalë nga varfëria e papunësia unë do jem në krahun tuaj”, u tha Rama banorëve të Tepelenës.

Rama u ndal në pikat kryesore të PS-së për rilindjen e bujqësisë, shërbimit shëndetësor rritjen e punësimit dhe uljen e taksave.
“Do ulim taksat për 95 % e shqiptarëve. Do të çojmë ujin në çdo familje e parcelë. Do pesëfishjmë financimin e shtetit për bujqësinë e blegtorinë. Mësuesit nuk do hyjnë më në punë me urdhër partie por di t’i zgjedhim së bashku me komunitetin e prindërve. Që në 100 ditët e para do ta bëjmë zero taksën e biznesit të vogël për të gjithë ata që janë të punësuar dhe mbajnë familjen e tyre me një dyqan të vogël. Do përgjysmojmë taksën e tatim fitimit. Nuk do të lejojmë më që dera e spitalit t’i përplaset në fytyrë një njeriu që nuk ka para. Do ta bëjmë shërbimin shëndetësor falas për të gjithë, të varfër apo të pasur. Do i japim fund braktisjes së fshatit dhe do nisim rilindjen aty ku nis rruga e prodhimit të ushqimit për popullin, tek fshati. Nuk do t’i kërkojmë më familjes së zakonshme të paguajë 20 % taksë për kilen e bukës, qumështit, vezës, miellit apo orizit. Do ti bëjmë zero taksat për produktet bazë. Do heqim dhe taksën e sëmundjes që katragjyshi me antiplumb i vuri ilaçeve”, tha Rama.