Një letër Dashamir Shehit

Përshëndetje DITA. Jam një qytetar shqiptar që kam jetuar prej shumë vitesh jashtë. Tani jam kthyer dhe ndjek me vëmëndje politikën shqiptare. Si qytetar i këtij vendi, më intereson politika, sepse sot për sot ky është sistemi që na drejton dhe na kërkon votën për të ecur përpara. Në emisionin “Opinion” të dt.30 Maj 2013, jam befasuar nga qëndrimi aspak i moralshëm sipas mendimit tim, i DASHAMIR SHEHIT. Shehi në këtë emisoin, tha se i kërkon qytetarëve që ta votojnë për tre arsye, e para se të djathtës i duhet dhe një mandat për të mbyllur këto punë që ka nisur, e dyta për të reformuar sistemin dhe e treta dhe më e çuditshmja që të …”RREGULLOJNË GABIMET E BËRA”, sepse sipas tij “edhe gabime janë bërë ore” dhe nuk i mohon as SHEHI. Dhe tek e fundit ai kërkoi jo një mandat por edhe më shumë, sepse sipas tij kjo gjë qenka shumë normale për një pushtet demokratik (them pushtet sepse shtet nuk ka, këtë e di mirë dhe SHEHI).

Në këtë pikë dua ti bëj një pyetje SHEHIT: Ky kryeministri i “së djathtës”, (sepse i tillë ka qënë, nuk ka qenë kurrë kryeministër i vendit apo i gjithë popullit) çfarë gabimesh ka bërë? Ka bërë gabim mbledhjen dhe zbritjen arithmetike të shifrave ekonomike? Ka bërë gabim mbledhjen dhe zbritjen e pronave që aq shumë ju e keni kërkuar ndër vite? Ka bërë gabim blerjen me miliona lek të deputetëve në momente pasigurie për të? Ka bërë gabim mbledhjen dhe zbritjen e statistikave për të papunët në Shqipëri? Ka bërë gabim mbledhjen dhe zbritjen e shifrave të fëmijëve të ngujuar për gjakmarrje në veriun e tij të dashur? Ka bërë gabim mbledhjen dhe zbritjen e shifrave për zhdukjen nga administrata të njerëzve kundërshtarë dhe mbushjen me militantë të devotshëm dhe skllevër me pagesë? Ka bërë gabim mbledhjen dhe zbritjen e shifrave për kthimin e analfabetizmit në Shqipëri? Ka bërë gabim mbledhjen dhe zbritjen e shifrave për konçensionet e hidrocentraleve, të minierave, të naftës, të energjisë?

Si shumë na dilkan këto gabime arithmetike o SHEHI. JU U SHPREHËT SE “KËRKONI EDHE MË SHUMË MANDATE”, gjë që është në një vijë lineare me deklaratën e përsëritur të kryeministrit tuaj dhe jo të gjithë shqiptarëve, se… “MU MË DUN SHQIPTARËT DHE KAN ME MË VOTUE DERI NË 2024!!! Çudi më të madhe nuk ka për ne qytetarët që vuajmë çdo ditë, faturat e vjedhjes së energjisë, ujit, pronave, çmimeve, papunësisë, dëshpërimit dhe pse jo, edhe gjendjes së rënduar psikologjike.

Sikur vetëm këto “gabime” të ekzistonin, ky kryeministër nuk ka të drejtë morale ti kërkojë njerëzve votën, të cilën e ka keqpërdorur jo vetëm në gabimet që përmendëm por edhe më thellë. Por gabimet nuk janë vetëm arithmetike SHEHI dhe ju e dini shumë mirë. Kryeministri juaj ka bërë “KRIME”. Dhe ne si popull mendojmë që drejtësia e dalë nga zgjedhjet duhet të gjykojë çdo veprim të pushtetarëve të sotëm kushdo qofshin ata apo ato. Sepse “krimet njerëzore” nuk fshihen dot me gomë!!!

Email nga adresa: [email protected]