Vargjet e Arben Dukës!

KUR KINI DEMOKRACINË, Ç’U DUHET PUNA DHE BUKA ?!

Nuk e kam bërë tjetër herë,
po sot do bëj një leksion,
për demokracinë shqiptare,
pak a shumë si funksionon!

Që të gjithë i bien qark,
po saktësisht nuk e dinë,
ndaj dhe unë do iki larg,
do të vete gjer në Kinë!

Dhe do marr njëmijë kinezë,
t’i çoj në një shkretëtirë,
do t’ju them me zë të lartë:
“Tani jini krejt të lirë!”

Tani jini krejt të lirë,
dhe demokracinë e kini,
mund të shani mirë e mirë,
që nga Maua gjer tek Pini!

Kini të drejtën e fjalës,
jini në demokraci,
as për Maon as për Tenin,
tani s’ju dënoN njeri!

Tani mund të bëni njerëz,
gjithësecili pas dëshirës,
mund të lëvizni pa “viza”,
tej e mbanë shkretëtirës!

Gjithsecili pas dëshirës,
si të dojë me zhurmë e bujë,
veçse kemi një problem,
këtu s’ka një pikë ujë!!

Po kini demokracinë,
krejt të lirë si era jini,
ka dhe një problem të vogël,
bukë për të ngrënë nuk kini!

Por nuk kini diktaturë,
se atë u’a hoqa unë,
pamvarsisht se këtu kurrë,
nuk do kini asnjë punë!

Këto janë gjëra të vogla,
ndaj u thotë Arben Duka:
“ Kur kini demokracinë,
ç’u duhet puna dhe buka?!”

Për demokracinë shqiptare,
gjeta një figuracion,
pikë për pikë si e përshkrova,
ka tetë vjet që funksionon!