LSI: Terror në Kukës, Berisha e Noka do përballen me ligjin

Lëvizja Socialiste për Integrim ka denoncuar sot publikisht me emra dhe fakte, terrorin që është duke u ushtruar mbi kandidatët e majtë, veçanërisht ata të LSI-së në qarkun e Kukësit, nga ministri i Brendshëm Flamur Noka, i cili kandidon në këtë qark.Në një konferencë shtypit të posaçme, Ralf Gjoni, Sekretar për Çështjet Ndërkombëtare në LSI, ka denoncuar “aktet e dhunës e të terrorit që po ushtrohen në qarkun e Kukësit e konkretisht ndaj z.Eshtref islami, të cilit i është bërë bastisje në shtëpi pa pasur mandat kontrolli dhe më pas është shoqëruar në komisariatin e policisë,  ku është mbajtur 2 deri 3 orë pa asnjë arsye.
Po sot në në mëngjes, kur ministri Noka ka qënë duke mbajtur takim elektoral, është telefonuar kandidati i LSI-së dhe forcat speciale kanë zbarkuar në mënyrë të dhunshme duke hyrë me forcë e kontrolluar shtëpitë e banorëve të Krumës, të afërm të z.Bardhoshi, pa asnjë mandate kontrolli.

Edhe shefi i Krimeve të zonës ka qënë i pranishëm kur i është kërkuar nga kandidati I LSI-së, arsyeja e këtyre kontrollove. Shpjegimi ka qënë se policia ka urdhër nga lart për të kryer operacione të tilla të paligjshme.  Është e qartë se ministri Noka po shndërrohet në një shkatërrues të zgjedhjeve.

LSI – bën thirrje që do mbajë përgjegjësi ligjore për aktivitetin kërcënues deri në veprime kriminale dhe klimën deri në terror në këtë qark. Për këto arsye”, – përfundoi Gjoni, – “kemi kontaktuar sot me zyrën e OSBE, të BE-së dhe ambasadën e SHBA-së se do të marrim të gjitha hapat e nevojshme për këto raste. Ne nuk do zmbrapsemi,përkunrdazi do punojmë edhe më fort për të siguruar fitoren.”

Sëbashku me Gjonin, në konferencën për shtyp ka dalë edhe Sekretari për Çështjet Zgjedhore në LSI, Ylli Manjani, i cili i deklaroi të gjitha këto sulme ndaj kandidatëve si përpjekje për të manipuluar votën. “Ne kemi porositur komisionerët tanë të jenë tejet të kujdesshëm në dy procedura”, – tha ai, – “së pari, në verifikimin dhe identifikimin e zgjedhësve me karta identiteti dhe pasaporta, veçanërisht të atyre zgjedhësve që vijnë nga jashtë, duke u kërkuar deri edhe vulën e hyrjes në Shqipëri. Kjo ndodh në kushtet kur kjo qeveri po porosit edhe karta të klonuara.

Procesi i dytë që komisionerët tanë në asnjë rrethanë apo arsye nuk do të tolerojnë të mos kryhet, është timbrosja, njollosja e gishtit me bojë. E vetmja garanci që zgjedhësit  nuk do të votojnë dy herë është pikërisht kjo. Pra, kjo ndodh në kushtet kur ky shtet po përpëlitet si hardhuca pa bisht, ne do të bëjmë çdo gjë të garantojmë votën e do të jemi këtu për të denoncuar të gjitha rastet.”