Nuk janë vetëm studentët shqiptarë që duan të shkollohen jashtë. Ka dhe të huaj që zgjedhin Shqipërinë për të marrë një diplomë.
Sipas Institutit të Statistikave të UNESCO-s në Shqipëri studiojnë 2,705 studentë të huaj.
Vendin e parë për numrin më të lartë të studentëve e mban Italia me 529 studentë që kanë zgjedhur të studiojnë në Shqipëri.
Studentët turq renditen të dytët me 308 studentë.
Në të dhënat e UNESCO nuk janë përfshirë studentët nga Kosova, të cilët vlerësohen se zënë vendin e parë për nga numri i studentëve të huaj në Shqipëri.
Nga përllogaritjet e Monitor numri i studentëve nga Kosova është 1269.
Shqipëria, preferencë e studentëve nga rajoni
Nga vendet e rajonit, Maqedonia ka numrin më të lartë të studentëve në Shqipëri, me 202 studentë, Mali i Zi me 200 studentë, Serbia me 166 studentë, Greqia me 20 studentë dhe Bullgaria me 6.
Destinacionet e preferuara të studentëve të huaj
Normën më të lartë të studentëve të huaj e kanë Shtetet e Bashkuara të Amerikës. Sipas të dhënave të UNESCO-s rreth 18% e studentëve që studiojnë jashtë kanë si destinacion ShBA-në.
Mbretëria e Bashkuar është e dyta më e preferuar, me rreth 11% të studentët që e zgjedhin.
5 nga 10 destinacionet më të preferuara të studentëve janë shtete europiane, ku përveç Anglisë, studentët preferojnë të shkojnë edhe në Francë, Gjermani, Itali dhe Rusi./Monitor
