Lufta e klaneve në PD po nxjerr jashtë loje Sokol Olldashin

Edhe pse ata nuk flasin kurrë publikisht kundër njëri- tjetrit, nëntoka e tyre zien.

Bëhet fjalë për klanet brenda Partisë Demokratike, që janë bërë gati për të zënë vendin e Berishës, pasi ai të humbasë zgjedhjet dhe të largohet nga politika.

Edhe pse kryeministri Sali Berisha ka deklaruar se ai ka ende shumë energji për të qëndruar edhe në opozitë, në rast të humbjes së zgjedhjeve, ai do dalë në pension dhe duket se po përgatit Lulzim Bashën si pasuesin e tij.

Shumëkujt i ka rënë në sy se si në inaugurimin e tunelit të Krrabës, violinë e parë ishte Lulzim Basha.

Po ashtu ata janë habitur me faktin se Sokol Olldashi, ministër i Transporteve ishte spostuar. Në ceremoni nuk ishte as Jozefina Topalli, e cila po ashtu ka një ftohje me kryeministrin Sali Berisha që nisi pas hartimit të listës së Shkodrës dhe është forcuar tani me daljen e Lulzim Bashës në ballë të fushatës.

Por gazeta Shqip shkruan se ndër të spostuarit në parti është edhe Sokol Olldashi, që aktualisht është angazhuar me fushatën e PS në Fier.

Ftohja mes Bashës dhe Olldashit ka nisur që pas vitit 2011, kur Basha kandidoi për Tiranën.

Klani Basha në këto momente ndjehet më i forti, por ende nuk dihet se cili do jetë rezultati pas zgjedhjeve.

Diçka dihet me siguri: në rast të humbjes nga PD, do kemi shumë për të parë e për të dëgjuar nga ajo parti pa zë.