Replikat për bunkerin anti-atomik, komentuesit në FB i kujtojnë Berishës, Hysen Shoshorin

Replikat për hapjen e bunkerit anti-atomik kanë shkaktuar reagime edhe në rrjetet sociale.

Veç fotove me ish-udhëheqësit komunistë komentuesit online i kujtojnë Berishës, Hysen Shoshorin, ish- i përndjekuri politik, që vuajti dënimin për shkak se shpërndau mijëra trakte kundër regjimit

Shoshori u bë i njohur pasi denoncoi publikisht se njeriu që dëshmoi kundër tij në gjyq, ishte Sali Berisha.

Megjithatë ai u përndoq edhe në demokraci dhe dëshmia e tij me shumë vështirësi arriti të dalë në media.

Pas vdekjes së tij në fund të shkurtit të këtij viti (në foto pamje nga varrimi), Shoqata e ish- të Burgosurve Politikë ka kërkuar nga Sali Berisha të kërkojë falje dhe të largohet nga politika.

“Hysen Shoshori, sot pas largimit nga jeta, është një pikë referimi për ligjin e lustracionit. Me këtë rast i bëjmë thirrje Sali Berishës që të kërkojë falje publike dhe të largohet nga politika, çka do të qetësonte qytetarët e frikësuar dje nga terrori e sot nga tritoli si dhe shpirtin e trazuar të viktimës së tij.

Apelojmë politikën për hapjen e dosjeve, që të identifikojmë bashkë punëtorët e Sigurimit, të cilët duhet të largohen menjëherë prej saj nëpërmjet aprovimit të ligjit të lustracionit,”  – thuhet në deklaratën e kryetarit të kësaj shoqate, Skënder Tufa.

Në një intervistë, Shoshori pati deklaruar se Sali Berisha kishte kërkaur që ai të varet në litar pse ka shpërndarë trakte kundër regjimit komunist.

“Unë në atë sallë gjyqi, të mbushur me popull, fiksova një fytyrë që m’u ngulit në mendjen time. Po priste mes këtij populli duke thënë “ky njeri që është marrë me këto trakte të varet në litar”, dhe në këtë moment nxori një trakt duke ia tundur kryegjykatësit.

Ky njeri që priste pranë këtij populli, nxori traktin nga xhepi dhe duke iu drejtuar kryetarit të gjykatës, “të varet në litar, që u mor me këto”, duke e tundur para popullit dhe sytë e kryetarit të gjykatës. Më habiti se viti që po u gjykoja ishte viti 1975. Kurse trakti që ky e kishte hequr mënjanë, dhe unë mendoja se mund ta kishte gjetur kur e kisha vendosur në Fakultetin Mjekësor, mund ta kishte gjetur vite më përpara se sa viti që po gjykohesha,” ishte shprehur Shoshori.

I pyetur se cili është ai njeri, Shoshori pati deklaruar: “Ky njeri, i cili është një komunist pasionant e fanatik i pandreqshëm, që për me arrit në majat më të larta të hierarkisë së pushtetit komunist ka përdorur dhe traktin tim, duke ndikuar drejtpërdrejtë në dënimin tim me vdekje, ishte Sali Ram Berisha.

M’u kujtua që ky emër, ishte i asaj fizionomie që thoshte për mua “të varet në litar”. Unë mund t’ju them që asnjëherë nuk mund të harrohet bisha që të kafshon”.