Samiti i Triestes, Rama rrëfen sekretin: Presidenti i Francës kërkoi atlete si të miat, ia dhurova

Kryeministri Edi Rama është komentuar gjerësisht gjatë këtij, më shumë, pasi është shfaqur me veshje sportive dhe atlete, jo vetëm gjatë fushatës elektorale por edhe në takimet e nivelit të lartë jashtë vendit.

Në emisionin “Tek unë me Arjola Shehun” në INtv, kryeministri Rama ka treguar detaje të ndryshme nga jeta e tij e përditshme, jo vetëm politike. Ai ka folur për raportet me bashkëshorten Lindën, nënën Anetën, dhe fëmijët.

Gjatë intervistës ndër të tjera, kryeministri ka folur për komentet lidhur me veshjen e tij në Trieste, sidomos për atletet e famshme për të cilat e shigjetuan pa fund dhe e akuzuan për prezantim jo dinjitoz.

E për këtë rast, kryeministri Rama tregoi një sekret, gjatë komunikimit me presidentin e Francës, Emmanuel Macron, të cilit i dhuroi një palë atlete si të tijat, pasi ai ia kishte kërkuar.

“Mund t’ju zbuloj një sekret të vogël, presidentit të Francës i çova një palë atlete se i pëlqyen shumë, i do këto i thash, apo një palë si këto, më tha një palë të tjera se këto nuk më bëjnë. Sa e ke numrin i thashë, dhe i dhurova një palë dhe ai u gëzua”, tha Rama, duke shtuar se Macron e ka numrin e këmbës 44, kurse ai 46.