Vazhdon pa pushim lufta në distancë mes tifozerisë ultras të Inter dhe Mauro Icardi-t.
Pas polemikave të krijuara nga libri i argjentinasit, pothuajse një vit më parë, dhe kërcënimeve që i janë bërë atij dhe familjes, marrëdhënia mes tifozëve më të zjarrtë të klubit milanez dhe kapitenit të Inter mund të thuhet se është prishur përfundimisht, por nuk ka qenë më e trazuar, të paktën deri tani.
Tifozeria ultras, e njohur ndryshe si “Curva Nord”, është kthyer në sulm me rastin e ndeshjes kundër Spal, e fituar nga Inter me rezultatin 2-0. Para ndeshjes tifozeria ka shpërndarë një fletushkë ku shkruhej:
“Nuk bëhen kore për Icardi-n. Ashtu si për asnjë lojtar tjetër. Nuk meritojnë asgjë. Kur shënohet gol shënon Inter-i, jo lojtarët.
Të festojmë për fanellën, jo për këta burra mediokër. Kur spikeri të lajmërojë formacionin mos e thërritni emrin e atij argjentinasi mosmirënjohës”.
Një mesazh ky që është përmendur nga të gjithë mediat italiane dhe që, natyrisht, ka përfunduar edhe në duart e Mauro Icardi-t.
Pasi sulmuesi ka shënuar golin me penallti, pavarësisht diktatit të tifozerisë ultras. I gjithë stadiumi ka thirrur emrin e tij. Një moment ky që Mauro Icardi e ka publikuar në profilin e tij në Instagram.