Fjalimi i parë madhor i presidentit Donald Trump përpara Organizatës së Kombeve të Bashkuara është pritur me kritika. Në adresimin e tij në Asamblenë e Përgjithshme, Trump i kushtoi vëmendje të veçantë të ashtuquajturave “kombe të pabesa”. Por ishin pikërisht zyrtarët e këtyre vendeve, ata që kritikuan fjalimin e presidentit Trump si të prapambetur e të papërshtatshëm.
Është pritur me kritika fjalimi debutues i Presidentit amerikan Donald Trump në Asamblenë e Përgjithshme të Kombeve të Bashkuara.
Gjatë adresimit të tij, Trump përfshiu Iranin në “grupin e vogël të regjimeve të pabesa” dhe kritikoi marrëveshjen mes Uashingtonit dhe Teheranit për programin bërthamor iranian si të.
Në përgjigje të këtij komenti, Ministri i Jashtëm i Iranit tha se fjalimi plot urrejtje i Presidentit amerikan i përket epokës mesjetare dhe jo Kombeve të Bashkuara.
Edhe Presidenti francez Emmanuel Macron shfaqi kundërshtinë e tij ndaj fjalës së Trump, teksa mbroi marrëveshjen amerikane për programin bërthamor të Iranit.
I vetmi person që mbështeti Presidentin amerikan në adresimin e tij, ishte kryeministri izraelit Benjamin Netanyahu që kërkoi ndryshimin ose shfuqizimin e kësaj marrëveshjeje.
Trump gjithashtu foli edhe për Korenë e Veriut, teksa tha se Shtetet e Bashkuara do ta shkatërronin tërësisht vendin nëse do të detyroheshin.
Ky koment si dhe shakaja e Trump për liderin koreano-verior Kim Jong-un si “njeriu raketë që është në një mision vetëvrasjeje” shkaktuan reagime në sallën ku po zhvillohej seanca.
Ndërkaq, nga Peniani nuk ka ende një reagim zyrtar sa i përket kërcënimeve të Presidentit.
Jashtë toneve kritike nuk mbeti as Ministri i Jashtëm i Venezuelës Jorge Arreaza, teksa vendi i tij u përshkrua nga Trump si një diktaturë e korruptuar socialiste ndaj të cilës Shtetet e Bashkuara do të marrin masat përkatëse.
Arreaza refuzoi kërcënimin e Trump, teksa tha se ky i fundit nuk është President i botës e nuk mund të menaxhojë as qeverinë e tij.