Arrestohen katër kokat e krimit dhe mbaron historia!!!

 

Natyrisht që zoti Lu,

qe një fat i madh për ne,

sepse flet çdo ditë këtu,

po nuk thotë asgjë të re!

 

Sepse luftën kundër Mafies,

e ka nisur përsëmbari,

skenarin e ka të gatshëm,

tamam pas filmit:”Kumbari!”

 

Zoti Lu e di tamam,

krimin e organizuar,

modeli amerikan,

këtu është implementuar!

 

Janë vetëm katër Familje,

pa to s’lëviz as një mizë,

po ti Llallës dot s’ja thua,

se Llallës i ke vënë vizë!

 

Për neve-njerëzit e thjeshtë,

shumë normale është frika,

gjersa Kryeprokurorin,

s’e dëshiron Amerika!

 

Sherret midis të mëdhenjve,

janë festë e madhe për krimin,

kur jashtë loje ke nxjerrë Llallën,

kush do ta bëjë reformimin?!

 

Kundra krimit-këtë vjeshtë,

duket se filloi Epoka,

puna qënka fort e thjeshtë,

janë vetëm katër koka!

 

Janë vetëm katër koka,

po prapë nuk na del hesapi,

kur ke kundra prokurorin,

kush vallë kokat do t’i kapi?!

 

Zoti Lu e ka staturën,

flet pa frikë dhe pa ndrojtje,

por kur keq u ndesh me Llallën,

Llalla shpejt u mor në mbrojtje!

 

Reforma në Drejtësi,

akoma nuk ka filluar,

dhe drejtësia tani,

është fare e bllokuar!

 

Zoti Lu na e tha prapë,

dhe hapi të njëjtin sherr,

se policia i kap,

po gjykata prapë i nxjerr!

 

Në formën më ordinere,

policia sot sulmohet,

kur nga gjithë ata që kap,

vetëm Një në Dhjetë dënohet?!

 

Dhe nga Luja-policia,

quhet partner i besuar,

pjesa tjetër-drejtësia,

është krejt e korruptuar!

 

Ndaj dhe në para të pista,

peshkaqënët po notojnë,

edh sot kundër “vetingut”,

me çdo formë rezistojnë!

 

Politika na shurdhoi,

na mbyti kakofonia,

misioni i opozitës:

“Të bllokohet drejtësia!”

 

Kuptohet-dhe maxhorancës,

nuk po i venë punët vaj,

do kuptohet për pak muaj,

kush ka pasur vërtet faj!

A. Duka