Rama: Nishani të mos bëjë noterin, Berisha të sillet sipas standardeve europiane

Rama mblodhi sot grupin parlamentar socialist të dalë nga zgjedhjet e 23 qershorit. Në një diskutim me deputetët e parlamentit që do të mblidhet në shtator, Rama tha se qeveria e re e dalë nga vota e shqiptarëve do t’i shpallë luftë krimit dhe korrupsionit, dy plagët e qeverisjes që e kanë çuar vendin drejt rrënimit.

“1 milion njerëz na dhanë mandat ti kthejmë sigurinë e humbur të jetës dhe pronës t’i shpëtojmë nga kriminaliteti dhe rrugaçëria dhe t’i marrim në mbrojtje nga shtypja poshtëruese. Ne nuk kemi votuar as për presidentin e sotëm dhe as prokurorin por ne nuk jemi votuar për ta rifutur qeverinë e këtij vendi në llogoren e luftës politike ndaj një kryeprokuroi që nuk ka bërë asgjë për të luftuar krimin dhe korrupsionin. Do qeverisim me papajtueshmëri të plotë me korrupsionin. Do punojmë krah për krah kundër krimit në çdo niveli e të çdo kohe sado të vjetër e të re.
Shpresojmë që Prokuroria të shënojë progres real në betejën me gangrenën e këtij vendi krimin e korrupsionin”, tha Rama.

Gjatë dy muajve në vijim deri në formimin e qeverisë së re, Rama tha se do të funksionojë Zyra e Kryeministrit të Zgjedhur, një strukturë e re që ka për qëllim koordinimin e çështjeve që kanë të bëjnë me qeverisjen e ardhshme.

Qeveria në detyrë të sillet sipas standardeve europiane

“Kryeministrit i përsëris edhe sot thirrjen publike për vetëpërmbajtje dhe përgjegjshmëri. Jetojmë në Europë dhe qeveria në detyrë të sillet sipas standardeve të Europës. Shqiptarët meritojnë respekt pasi zgjodhën me 1 milionë vota projektin tonë fitues dhe refuzuan projektin e qeverisë aktuale. Humbësit nuk mund të sillen sikur nuk ka ndodhur asgjë dhe aq më pak si fitues”.
Nishani të mos bëjë noterin

“Gjatë ditëve të fundit mora takime në funksion të këtij 2 mujori tranzicioni me presidentin Bujar Nishani, kryeprokurorin Adriatik Llalla dhe Guvernatorin e Bankës Ardian Fullanin. I falënderoj për disponimin dhe frymën pozitive të bashkëpunimit, por nuk mund të mos bashkohem me shqetësimin e ngritjes në detyrë nga KLD të një sërë gjyqtarësh. I kam thënë Nishanit se fakti që vijmë nga dy kampe kundërshtare nuk është problem por rëndësi në kulturën e një bashkëpunimi. Dua të shpresoj që dhe ai ta shohë kështu e të punojë me mua, bashkë me kryetarin e Kuvendit jo si noter i një pale që ka humbur zgjedhjet por garant i Kushtetutës.  Dua të shpresoj se presidenti do ta lexojë mirë  votën e 1 milionë shqiptarëve që na dhanë 84 mandate. Ne do të respektojmë në frymë e në germë Kushtetutën në marrëdhëniet me gjyqësorin por nuk do të bëjmë sehir asnjë ditë duke parë si vritet e drejta në sallën e gjyqit”.

Jo fshesës në administratë

Rama tha se  ajo që është më e rëndësishmja për socialistët, për të mbajtur qytetarin që i votoi, por edhe për të qenë pranë pakicës, është marrëdhënia e ngushtë dhe e ndershme me çdo individ.  Rama ritheksoi se nuk do të ketë largime nga puna për zëvendësimin e profesionistëve me militantë.

“T’i hapim derën çdo njeriu që troket te ne, të mbajmë shënim çdo hall të qytetarit. Sot jemi përballë dallgës për punësim. Ndaj nuk do të kishte asgjë më jonormale që këtë proces ta linim në rënie të lirë apo të aplikonim punësimin nga lidhjet e shkurtra. Do të ngremë një grup pune që përcakton metodologjinë e trajtimit me transparencë e respekt të punonjësve në çdo institucion. Asnjë militant apo mbështetës nuk duhet të anashkalohet për të favorizuar dikë tjetër. Por në emër të partisë nuk mund të lejojmë diskriminimin dhe përjashtimin e dikujt për t’i hapur vend një tjetri. Të drejtë me njerëzit dhe po njësoj të drejtë me shoqërinë dhe shtetin që duam të ndërtojmë. Sepse në të kundërt do të humbasim njerëzit që na dhanë mundësinë për t’u provuar. Nëse nuk duam të përfundojmë si pala tjetër duhet të gjejmë njerëzit për punën, jo punën për njerëzit. Duhet shmangur çdo lloj fshese. Kemi një grup pune për të sintetizuar metodologjinë e trajtimit të burimeve njerëzore. Synimi është që Shqipëria të ketë një agjenci të posaçme të burimeve njerëzore. Duhet të kemi një informacion të detajuar për të gjithë ata që kanë investuar në dije dhe kanë diçka për t’i dhënë këtij vendi”

Qeveri që do kushtojë më pak

“Nuk e di nëse qeveria do të ketë më shumë apo më pak ministra, por di që do të jetë një qeveri që do të kushtojë më pak. Deri më sot jemi gjykuar nga fjalët, nga sot gjykohemi nga veprat. Kohë për të humbur nuk ka dhe kjo kohë deri në 9 shtator vendos shumë për profilin e shumicës së re parlamentare të Shqipërisë”.

Pritshmëri e lartë në arenën ndërkombëtare

Kam marrë shumë urime nga miqtë ndërkombëtarë, por nuk kam publikuar asnjë urim, pasi më ka bezdisur gjithmonë ky fakt. Pritshmëria jonë në arenën ndërkombëtare është po aq e madhe sa e atyre që na votuan në 23 qershor. Zëra shumë autoritarë ma kanë përcjellë shumë qartë mesazhin se jemi shpresa e fundit e një gjenerate.

Porosia e Ramës

Mos harroni sheshet e mbushura me njerëz që tek ne nuk i solli kërcënimi me bukën e gojës, por shpresa për një të ardhme më të mirë.