Londër, Rama takon Blair: Vendosëm piketat e para të qeverisjes

Kryeministri i zgjedhur, Edi Rama është takuar sot paradite me ish-kryeministrin e Britanisë së Madhe, Toni Blair, me të cilin ka diskutuar për rreth 2 orë lidhur me piketat e para të qeverisjes. Pas takimit Edi Rama është shprehur:

“Është një kënaqësi shumë e madhe që takimin e parë pas zgjedhjeve, jashtë Shqipërisë, unë e bëj me një mik të madh, që përveçse çka njihet është edhe një pikë referimi e kahershme e imja dhe e jona si Parti Socialiste. Ndërkohë jam shumë i lumtur që kjo fitore na jep mundësinë të kemi ndihmën e një miku të madh, një kryeministri që ka lënë gjurmë në historinë e Anglisë dhe të botës mbarë dhe e një njeriu që nuk harron asnjëherë të përsërisë se është një mik i madh i Shqipërisë dhe shqiptarëve”.

Nga ana e tij Toni Blair ka thënë:

“Së pari, dua të uroj Edi Ramën për fitoren e tij të jashtëzakonshme. Ky është një moment i duhur që Shqipëria të bashkohet me qeverinë e re dhe me programin e saj të ri. Jam i sigurt se ekziston një vullnet i madh në komunitetin ndërkombëtar për t’i uruar qeverisë punë të mbarë dhe të jetë e suksesshme. Sfidat e vendit janë shumë të mëdha, por unë e di se ka një vendosmëri të jashtëzakonshme për t’i kapërcyer ato. Si dikush që e konsideron veten një mik të Shqipërisë dhe shqiptarëve ne jemi të lumtur t’ju ndihmojmë me mundësitë tona më të mira. Dua t’ju uroj juve z. Rama gjithë të mirat, duke ditur sesa punë e vështirë është të jesh Kryeministër. Fat të mbarë dhe duhet të dini se gëzoni një mbështetje të gjerë në komunitetin ndërkombëtar që të realizoni me sukses këtë detyrë”.

***

Takimi ne Londer

Kryeministri i ardhshëm Edi Rama ka nisur një vizitë dyditore në Londër, të cilën e ka njoftuar nëpërmjet një postimi në Twitter.

“Ne aeroportin e Londres, ku sapo zbritem per takimin e punes neser me kryeministrin Tony Blair dhe ekipin e tij” shkruan Rama.

Ky takim pason atë të muajt maj, nga ku Rama mori gadishmërinë e ish-kryeministrit britanik Blair për të këshilluar Ramën nëse ai fitonte zgjedhjet. Lajmi i gadishmishmërisë së Tony Blair për të këshilluar Ramën u komentua në menyrë të ndryshme nga gazetat si në Londër, po ashtu edhe në Tiranë.

Por Rama e ka sqaruar këtë situatë me një deklaratë ku tha se: “Ka një ngutje të madhe, të kotë për të bërë krahasime mes Blair-it dhe Podesta-ve, që paguhen me paratë e shqiptarëve për të dezinformuar opinionin ndërkombëtar dhe për të zbukuruar imazhin e një qeverie të korruptuar deri në palcë”.

Më tej ne deklarimin e tij Rama u shpreh se  “Të jeni të sigurt se vullneti i Blair-it për të ndihmuar Shqipërinë nuk ka çmim për të mirat që do sjellë. Ndërsa kontrata nuk do të rëndojë hiç fare mbi buxhetin e shtetit dhe të publikut”.

Tani që Rama është konfirmuar si kryeministri në ardhje i vendit ky takim merr një rëndësi të veçantë, pasi pritet të diskutohet me terma konkretë se ku do të konsistojë ndihma e Toni Blair për kabinetin Rama.

Krahas njoftimit të postuar në Twitter, Rama ka publikuar edhe një foto në terminalin e aeroportit ku disa bashkëdhëtar të linjës Tiranë-Londër e kanë ndaluar për të patur një foto me kryeministrin e ardhshëm të vendit.

Sakaq gjatë qëndrimit Rama është ftuar nga gjigandi mediatik britanik BBC për t’u intervistuar në emisionin ‘Hard Talk’. Formati këtij emisioni është i ndërtuar pyetje-përgjigje dhe të ftuarit janë lider botërorë.

Neser takime ne Rome

Kryeministri në pritje për të marrë detyrën, Edi Rama do të jetë nesër në Romë për takime me kryeministrin italian, Enrico Letta dhe ministren e Jashtme të Italisë, Emma Bonino.

Siç bën të ditur agjencia zyrtare italiane e lajmeve Ansa, kreu i Partisë Socialiste shqiptare pas fitores në zgjedhjet e qershorit do të vihet në krye të qeverisë në muajin shtator.

Bëhet e ditur që Rama do të marrë pjesë nesër në mëngjes edhe në një takim në Fondacionin e Massimo D’Alema-s “Italianieuropei” (Italianë europianë).

***

Rama në Londër, sot takohet me Tony Blair

Kryeministri i zgjedhur i Shqipërisë, Edi Rama ka udhëtuar pasditen edjeshme drejt Londrës. Burime nga Partia Socialiste bëjnë me dije se shefi i mazhorancës së re do të zhvillojë një takim pune me ish-kryeministrin britanik, Tony Blair, i cili do të jetë edhe këshilltar i qeverisë socialiste. Lajmin e mbërritjes në Londër, kreu i PS-së e ka publikuar në profilin e tij në Twitter, duke publikuar edhe një fotografi në aeroport, shkruan se nesër do të takohet me Blair. “Ne aeroportin e Londrës ku sapo zbritem për takimin e punës nesër me km Tony Blair dhe ekipin e tij”, shkruan Rama.