Ahmetaj: Qeveria po përpiqet të lërë pas rrugë të minuara në energjetikë, financa e investime publike

Deputeti i Partisë Socialiste, Arben Ahmetaj, në emër të PS-së shpreh shqetësimin për situatën energjetike në vend. Ahmetaj thotë se arsyet që kanë çuar drejt përkeqësimit të gjendjes janë keqmenaxhimi i Entit Rregullator dhe rritja e borxheve. Në kushtet kur pparashikimet flasin për një veshtë pa reshje, Ahmetaj thotë se duhet ruajtur niveli I ujit në kaskadën e Drinit, për të parandaluar kolpasin energjetik.

“Menaxhimi i keq e ka përkeqësuar situatën energjetike dhe ka vënë një pikëpyetje shumë serioze të dy elementëve primarë. Ka vënë një pikëpyetje në buxhetin e shtetit për atë që do të ndodhi në vjeshtë dhe ne kemi qenë dëshmitarë të rialokimeve serioze, gati 150 milionë euro nga buxheti i shtetit, nga investimet shumë të nevojshme në pagesat për energjetikën. Është detyrë emergjente e institucioneve të përfshira që të ruajnë nivelin e Kaskadës së Drinit sot dhe të ruajnë një ekuilibër jashtëzakonisht shumë të monitoruar në mënyrë të përditshme midis asaj që importohet dhe asaj që eksportohet”, deklaroi Ahmetaj.

Ahmetaj tha se PS ka prova konkrete që po ndërhyhet në sistemin e faturave dhe akuzoi qeverinë se po merr masa ekonomike që kanë për qëllim vështirësimin e punës për qeverinë e re.
“Kemi informacione që sistemi i klientelës në CEZ është prekur për keq dhe mbledhja e faturave është kthyer në një negociatë abuzive në dëm të situatës financiare të CEZ-it. Në fakt nga çfarë po monitorojmë, shohim një praktikë jashtëzakonisht të rëndë dhe abuzive nga qeveria në ikje. Sali Berisha dhe sot duke ikur, kërkon që t’i lërë qeverisë së re një rrugë të minuar në energjetikë, në financa dhe një rrugë të minuar në investimet publike e marrëdhëniet me partnerët tanë ndërkombëtarë”, u shpreh Ahmetaj.