Komuniteti Mysliman: OK me vendimin e qeverisë për Xhaminë

“Projekti i ndërtimit të Xhamisë së Namazgjasë do të vazhdojë dhe shumë shpejt besimtarët do të kenë një objekt ku mund të kryejnë ritet e tyre” – Kjo ka qenë deklarata e drejtuesve të Komunitetit Myslyman të Shqipërisë, të cilët nëpërmjet një njoftimi për shtyp shprehen se ashtu sikurse tha edhe Kryeministri Rama ne deklaratën e tij një ditë më parë , projekti i Xhamisë së Namazgjasë do të vazhdojë dhe gëzon mbështetjen e plotë të qeverisë, duke hedhur kështu poshtë deklaratat publike te opozitës se xhamia u anulua. Përsa i përket shqetësimit në lidhje me truallin  shprehen drejtuesit e komunitetit mysliman, – kemi sigurinë e qeverisë se është menduar një zgjidhje e përshtatshme sipas dispozitave ligjore në fuqi.

Pronarët e tokës: Komuniteti Mysliman na preu në besë

Pronarët e një pjese të tokës ku do ndërtohej Xhamia e Namazgjasë, janë zemëruar me qëndrimin e Komunitetit Mysliman. Kryetari i Bashkisë së Tiranës, Lulzim Basha, zbuloi se pronarët e tokës kishin ofruar territor për Xhaminë e Namazgjasë, në këmbim të ndërtimit të një godine polifunksionale. Por kur Këshilli Kombëtar i Territorit rrëzoi lejen për godinën polifunksionale, duke lënë në fuqi vetëm lejen për xhaminë, Komuniteti Mysliman doli në mbështetje të qeverisë. Kjo ka irrituar pronarët e tokës. Bëhet fjalë për familjen Kruja. Nipi i kësaj familje, Alban Bala,  thotë se Komuniteti Mysliman i preu në besë: “Bëhet fjalë për një objekt të përshkallëzuar, 3-4-6 dhe 8 kate, në formë shkallareje, i cili ishte bërë në harmoni me projektin e xhamisë, pasi u projektua nga e njëjta studio turke arkitekturore që realizoi projektin e xhamisë. Ne i dhamë dorë të lirë Komunitetit Mysliman që, edhe objektet që do ndërtoheshin në pronën tonë të bëheshin në harmoni me xhaminë, por Komuniteti u tregua i pabesë me deklaratat që nxjerr. Ai thotë se gëzojnë mbështetjen e qeverisë për projektin, duke anashkaluar marrëveshjen noteriale që ne kemi, e cila tashmë u rrëzua,” tha Bala

Frashëri: Projekti i Xhamisë, thjesht kamuflazh për të mashtruar publikun

Ne si përfaqësues të shoqërisë civile jemi të lumtur që më në fund u vërtetuan dyshimet dhe pretendimet tona që projekti i Xhamisë ka qenë thjesht kamuflazh për të mashtruar opinion publik për të legjitimuar ndërtimin e një kompleksi të madh tregtar pas xhamisë. Ne jemi të angazhuar për ti shkuar deri në fund mbrojtjes së hapësirës publike, si një Rekurs i domosdoshëm për të parandaluar një krim urban. Presim zbardhjen e këtij vendimi për të përcaktuar se cfarë veprimesh apo do të ndërmarrim në të ardhmen – tha dje në një prononcim për DITA , Kastriot Frashëri, drejtues i Institutit të Çështjeve Kombëtare, INA, institut i cili para disa javësh ka kërkuar në Gjykatë anullimin e lejes së Bashkisë.

Frasheri organizoi  një tryezë me përfaqësues nga Shoqëria Civile, Inxhinierë, Arkitektë, Urbanistë dhe Mjedisorë, e cila e ka quajtur Vendimmarrje të gabuar vendimin Nr. 2, datë 29.05.2013 të KKT, “Për miratimin e dhënies së lejës zhvillimore komplekse për Xhaminë e Namazgjasë”.

Në një rezolutë të firmosur nga pjesëmarrës në këtë tryezë thuhet se ky vendim shkakton “shkatërrimin e parkut publik, përmes ndërtimit arbitrar të një objekti fetar me procedura jo transparente, për qëllime politike, si dhe të dy kullave të larta si qendra tregtare që qëndrojnë të fshehura pas projektit të xhamisë”. Rezoluta i është dërguar Presidentit Nishani, Berishës dhe Bashës, Ramës dhe Metës, përfaqësueses së OBSH-së në Tiranë si dhe për dijeni Komunitetit Mysliman dhe ambasadave në Tiranë.

“Gjithë analiza dhe ekspertiza shkencore, mbështetur në kondicionet urbane, arkitekturore dhe mjedisore, si edhe në vlerësimin e mbështetjen e opinionit publik për këtë çështje na detyron t’ju bëjmë me dije se:

1. Këto tre institucione, në asnjë rast dhe në asnjë shembull të vendeve të tjera në botë, nuk mund të qëndrojnë së bashku; 2. Të tre këto institucione kanë: – funksione të lejuara krejt të ndryshme nga njëra- tjetra, madje – funksione të lejuara që përplasen me njëra- tjetrën.  3. Të tre këto institucione janë në dis-harmoni të plotë nga pikëpamja urbane dhe në  kundërshtim të plotë me ligjin e mesiperm, për shkak të: – afërsisë së patolerueshme me njëra- tjetrën,

– intensitetit të lartë të ndërtimit (mbi 3.2),  – të koefiçientit të lartë të zënies së territorit (mbi 0.9); – thuhet ndër të tjera në rezolutë.

Nënshkruesit theksojnë se “nuk kemi ndjenja anti-islame, por jemi kundër ndërtimit të dy kullave për qëllime biznesi dhe të xhamisë, jo vetëm për shkak të vendit të përzgjedhur, por edhe për mënyrën se si kjo e fundit kërkon të ndërtohet, si një projekt arkaik”. Rezoluta kërkonte anullimin e Vendimit Nr. 2, datë 29.05.2013 të KKT,  dhe “ndërprerjen e menjëhershme të punimeve”.

*************

Kryetar Bashkie apo Sekser Xhamie?

Komuniteti Mysliman i dha fund një gënjeshtre që po zgjaste lidhur me pazaret e Lulëzim Bashës me truallin ku do të ndërtohet Xhamia e Namazgjasë. Me një deklaratë të shkurtër pa shumë komente, përfaqësuesit e myslimanëve të Shqipërisë shpresojnë se qeveria Rama do t’i mbështesë në ndërtimin e Xhamisë së Namazgjasë, duke injoruar alarmin e Lulëzim Bashës për prishjen e kontratës së tokës për shkak të pazarit të bërë në hije prej tij.

Argumenti që Lulëzim Basha paraqiti publikisht është se pronarët e tokës së Namazgjasë i kanë dhuruar dy mijë metra tokë për xhaminë, me kusht që Basha t’u jepte leje ndërtimi për dy kulla!!! Nëse këtë deklaratë do ta kishte bërë ndonjë kritik tjetër i Bashës, nuk do besohej. Problemi është që këtë e bëri vetë Lulëzim Basha, pa iu dridhur syri me sinqeritetin e një sekseri trojesh në Tiranë larg kostumit të kryebashkiakut.

Këtij njeriu dikush duhet t’i thotë që është kryetar i Bashkisë së Tiranës dhe jo sekser i trojeve të Tiranës. Detyra e një kryetari Bashkie është të zhvillojë qytetin përmes projekteve që harmonizojnë zhvillimin me historinë dhe paqen sociale. Detyra e tij në këtë rast është të ofrojë një vend ku duhet të jetë Xhamia e Namazgjasë dhe të miratojë projektin e saj. Objektet e kultit janë interes publik dhe kanë prioritet mbi interesat e klientëve të tij. Në këtë rast nuk ka rëndësi kush është pronar toke, pasi atij i blihet toka. Rëndësi për një kryebashkiak është të ketë një projekt modern, të pranueshëm, në harmoni me qytetin dhe që i shton atij një vlerë urbanistike dhe historike.

Po ta shikosh fjalorin e Lulëzim Bashës, të duket sikur ai qan hallet me Kunatin që i kanë ikur ca lekë nga duart me këtë leje, dhe jo që Tirana do ketë një xhami, e cila duhet të ndërtohet në një vend dinjitoz me një projekt dinjitoz. I zhytur në batakun e pazareve për truallin e xhamisë, ai foli si një sekser, me të cilin duhet të ketë punë prokuroria.

Këtij njeriu i duhet kujtuar se nuk e diktojnë pronarët e tokës planin urbanistik të Tiranës, por Bashkia. Nëse ata janë klientë të zhgënjyer të Bashës si pazarxhinj, kjo është histori mes sekserëve dhe pronarëve, por jo histori mes myslimanëve dhe qytetit të Tiranës. Me logjikën që flet Basha, i bie që dy kullat që do ndërtoheshin aty, mund të mos ndërtoheshin nëse nuk spostohej aty projekti i  xhamisë. Nga kjo logjikë rezulton se Basha e ka spostuar xhaminë nga Pallati i Kulturës tek Namazgjaja, pikërisht për të bërë këtë pazar dhe jo për të ndërtuar xhaminë.

Edi Rama e bëri një projekt modern për xhaminë pas Pallatit të Kulturës, por nuk hyri në pazar për trojet e pronarët. Thjesht bëri detyrën si kryebashkiak dhe tha se Tirana ka nevojë për këtë xhami moderne në këtë vend. Nuk dëgjuam që ai kapi një pronar, i premtoi dy kulla që ai t’i jepte tokën xhamisë, etj. Sulmi që atëherë Lulëzim Basha dhe Sali Berisha i bënë Edi Ramës, ishte pikërisht se njolla e xhamisë ishte në troje private dhe ata nuk mund të dëmtoheshin. Askush nuk thotë të dëmtohen. Ata thjesht duhen dëmshpërblyer sipas Kushtetutës me çmimin e tregut dhe xhamia të ndërtohet aty ku është më mirë. Fakti që Basha dhe Berisha e spostuan projektin e Ramës nga Pallati i Kulturës tek Namazgjaja, dhe e çuan sërish në tokë pronarësh duke bërë pazar të fshehtë me ta, tregon se ata kanë pasur interes direkt në këtë histori për trojet dhe jo për xhaminë. E pranuar nga vetë Basha publikisht, kjo bëhet dhe më e rëndë.

Së fundi, dua të them se vendimi për ndërtimin e Xhamisë së Namazgjasë dhe bllokimi i ndërtimit të dy kullave në krah të saj, është ndoshta një nga vendimet më të mira të Edi Ramës qyshkurse është bërë kryeministër. Përmes këtij vendimi, u nda përfundimisht gënjeshtra e Lulzim Bashës për xhaminë nga interesat e tij kontraktore lidhur me truallin e saj dhe iu kthye myslimanëve një e drejtë legjitime. Por mbi të gjitha u prezantua para qytetarëve se cili është interesi themelor që lëviz vendimmarrjen e Lulzim Bashës. Ata që mendonin se ai hiqej si mysliman për disa vota, janë ende shumë larg qëllimit real. Ai e përdori Komunitetin Mysliman për interesa tërësisht klienteliste, që nuk kanë të bëjnë me xhaminë, por me pazaret për trojet, që ai dhe njerëzit e tij bëjnë orë e çast në Tiranë.  Ai është aq i vogël dhe meskin, sa nuk ka fuqi t’i rrijë larg këtyre pazareve, por i bën ato publike si shqetësim kryesor. Është tipike çfarë ndodh me mashtruesit kur u del gënjeshtra dhe nuk dinë si të justifikohen para atyre që kanë mashtruar. Është tipike për dikë që ka harruar se quhet kryetar Bashkie dhe jo sekser xhamie!