Orientimi strategjik i Shqipërisë drejt SHBA-BE i tronditur thellë

Nga Petrit Vasili

Për shkak të një kryeministri peng interesash të errëta, Shqipëria sot gjendet në ç’orientimin më të rëndë dhe të qëllimshëm strategjik dhe kombëtar si asnjëherë në këto 27 vite pluralizëm.

Orientimi strategjik madhor drejt SHBA është sot jo vetëm i dyzuar por dhe i shantazhuar. Realitete ekstraamerikane të lyera me bojën e interesave ekonomike të zymta po ju vihen në tavolinë shqiptarëve si zgjidhje më të “ëmbla” dhe me të “këndshme” se sa sprova e demokracisë se fortë, parimore dhe të panëgociueshme amerikanë e cila e shendosh Shqipërinë dhe e bën atë një realitet të qëndrueshëm politiko-social.

Logjika e parave mbi demokracinë po dominon edhe marrëdhëniet me BE duke e shantazhuar edhe raportin me të.

Çdo kërkesë për vendosjen e shtetit ligjor nga SHBA dhe BE po shantazhohet nga kryeministri dhe ata që e ndjekin pas me kërcënimin shume të rrezikshëm se “do shkojmë andej nga na japin para”, pavarësisht erës shpesh të qelbur të tyre, që natyrshëm nuk janë as dollarë dhe as euro por para’ të tjera gjithfarësh.

Votimi kundër Amerikës në OKB apo deklaratat e kryeministrit në Bruksel se “nuk presim gjatë BE dhe do shohim edhe alternativa të tjera” janë akte publike të një banditizmi politik qe shkatërron orientimin e patjetërsueshëm strategjik drejt ShBA dhe BE dhe një alibi për të përligjur veprime tepër të errëta, që po çojnë drejt largimit nga ky orientim.

Apatitë e “çuditshme” të SHBA dhe BE në Tiranë kanë qenë një mundësi me shume qe ky destruktim strategjik i kryeministrit të bëjë udhë.

Shqiptarët janë shumë të qartë ata kanë vetëm një bosht strategjik, qe kalon nga SHBA dhe BE dhe tek vlerat fondamentale qe inspirohen në Uashington e Bruksel dhe jo tek përkthimet e shtrembura lokale.

Ky kryeministër qe sot rastësisht qeveris vendin dhe që e minon ketë orientim strategjik do të refuzohet me forcë dhe me çdo çmim edhe nga shqiptari me i fundit.

Ky refuzim mbarëkombëtar ndaj këtij komunizmi “të ri” izolues të parave të pista është sot një mision i shenjtë kombëtar.