Matura e pasuksesshme, tek gjuhët e huaja fitojnë maturantët e dobët

Cilësia në universitete lë shumë për të dëshiruar, dhe një pjesë e konsiderueshme e përgjegjësisë për këtë gjendje i ngarkohet Maturës Shtetërore, e cila po e rëndon edhe më tej bilancin e prurjeve të reja jocilësore në auditorët publikë. Gjatë viteve të fundit drejtuesit fakulteteve publike, duke iu referuar edhe nivelit të nxënësve të përzgjedhur, ngrenë alarmin se Matura Shtetërore nuk rezulton të jetë më e suksesshme, dhe është koha që ajo të përballet me ndryshime kundrejt arritjes së synimit për të realizuar prurjet cilësore që duhet të kenë fakultetet. Ndërkohë që pikëpyetje të shumta ngrihen edhe mbi mënyrën se si administrohet matura, pasi është vënë re se rregullat e mbikëqyrjes së zhvillimit të provimeve nuk janë të njëjta si për kryeqytetin, ashtu edhe për rrethet.

Kjo gjë është faktuar edhe me numrin e lartë të fituesve të pranuar në fakultetet e kryeqytetit, të cilët në masë vijnë nga rrethet. Këto problematika bëhen edhe më të theksuara në Fakultetin e Gjuhëve të Huaja të Universitetit të Tiranës. Dekania e këtij fakulteti, Klodeta Dibra bën me dije se institucioni universitare që ajo drejton prej kaq vitesh po ndeshet me një nivel të dobët të studentëve, të cilët përzgjidhen përmes modelit të Maturës Shtetërore. Një fakt i tillë shqetësues vihet në dukje më së miri nga niveli i ulët i kalueshmërisë që raportohet në fund të vitit të parë akademik. “Matura shtetërore për Fakultetin e Gjuhëve të Huaja nuk ka pasur sukses. Kjo sepse na kanë ardhur studentë me nivel shumë të dobët, madje ka pasur edhe studentë që gjuhën e huaj nuk e kanë njohur fare.

Kundrejt kësaj situate ne kemi vepruar me një përmirësim të kurrikulës. Sigurisht që përmirësimet nuk mund të bëhen çdo vit pasi kjo do të cenonte pastaj cilësinë e mësimdhënies. Por, jemi përpjekur që të bëjmë disa bilanca duke pasur parasysh të paktën tre vite akademike. Aktualisht jemi duke u përgatitur që të bëjmë disa ndryshime edhe vitin e ri që iniciojmë në tetor, duke pasur parasysh edhe kalueshmërinë.

Në rang fakulteti për sezonin e qershorit kemi një kalueshmëri deri diku 30 për qind. Pra nga numri i studentëve dhe këto nuk janë vetëm ata që janë të ciklit 3-vjeçar, por kemi shumë studentë mbetës dhe përsëritës. Pra janë studentë të cilët mund të kenë pese gjashtë vite të regjistruar, të cilët ende nuk janë diplomuar”, shprehet Dibra. Për vitin e ri akademik 2013-2014 në auditorët publike do të ulen për herë të parë rreth 30 mijë studentë të rinj, këta të shpërndarë në të gjitha programet universitare.

Administrimi problematik i maturës

Procesi i mbikëqyrjes së provimeve të maturës është edhe një ndër pikat më të debatueshme sa i takon procedurës së përzgjedhjes së kandidatëve fitues që pranohen në universitetet publike të vendit. Kjo pasi mbikëqyrja e provimeve në Tiranë është shumë e fortë, ndërsa në rrethe jo, çka u lë më shumë hapësirë maturantëve të rretheve që të fitojnë një të drejtë studimi në fakultetet e Tiranës. “Kur ne na vijën listat e fituesve të Maturës Shtetërore, fatkeqësisht maturantë të Tiranës kemi shumë pak. Kjo situatë nuk është prezente vetëm në Fakultetin e Gjuhëve të Huaja, por është një praktikë e shfaqur në të gjitha fakultetet e tjera të kryeqytetit.

Duke qenë e tillë kam dyshimin se në Tiranë bëhet shumë presion gjatë Maturës Shtetërore, dhe kjo është një gjë e mirë, nëse duam të kemi rregullsi dhe transparencë të procesit. Ndërkohë që kam dyshime se në rrethe nuk veprohet në të njëjtën formë”, shton më tej Dibra. Sipas saj duhet t’i jepet më shumë përparësi autonomisë së universiteteve, ku përzgjedhja e kandidatëve që vijojnë studimet në to të bëhet e drejtpërdrejtë, sikundër ndodh në të gjitha universitetet jashtë vendit, të cilat nuk përballen me probleme të tilla sa i takon cilësisë.