Një tjetër sjellje e pahijshme në selitë diplomatike të Kosovës

Sjellja mospërfillëse dhe aspak profesionale e një punonjëseje të ambasadës së Kosovës në Bernë të Zvicrës i ka kushtuar asaj vendin e punës. Punonjësja e zyrës së pritjes është fotografuar gjatë orarit të punës me këmbë mbi tavolinë dhe duke lexuar revista dhe fotoja ka përfunduar në media. Portali Indeksonline, e cila u referohet burimeve të saj shkroi dje se zyrtarja është ndër  punëtorët më të privilegjuara të ambasadorit të Kosovës në Zvicër, Naim Malaj.

I menjëhershëm ka qenë reagimi i ministrit të Punëve të Jashtme, Enver Hoxhaj, I cili e ka shkarkuar nga puna zyrtaren për sjellje të pahijshme. Shkarkimi I saj erdhi vetëm pak orë pasi Ministria e Jashtme e Kosovës tërhoqi zv.ambasadorin kosovar në Kroaci, Urtak Hamiti.  Dy ditë më parë, ky i fundit u shfaq i dehur në rrugët e qytetit, duke vënë në rrezik jetën e kalimtarëve me makinën e tij.