Tërhiqen financuesit, shpërbëhet Flamurtari

Kampionati i ri kombëtar mund të llogarisë një pretendent më pak, teksa Flamurtari i Vlorës, i ndërtuar me pretendime të mëdha, është thuajse në buzë të greminës. Klubi i Shpëtim Gjikës ka kaluar në krizë financiare dhe nuk është në gjendje të paguajë futbollistët profesionistë të skuadrës, përfshirë edhe ata që mori me bujë në merkaton e kësaj vere, si Ilion Lika apo Erion Dushku. Lajmi është konfirmuar nga administratori i klubit, Geri Çipi, i intervistuar nga televizioni Top Channel. Çipi ka theksuar se asnjë nga lojtarët e ardhur nga qytete të tjera nuk do të mund të qëndrojë me kuqezinjtë. “Për shkak të financave të pakta që kemi siguruar për këtë vit, kemi vendosur një strategji të re për ekipin e këtij sezoni. Do të krijojmë një skuadër me lojtarë nga Vlora dhe me futbollistë që vijnë nga ekipet e moshave të Flamurtarit.

Do të ngremë një skuadër modeste por konkurruese në kampionat, me aq mundësi sa kemi”, është shprehur Çipi. Për të gjithë ata lojtarë që janë nën kontratë me klubin, por që nuk plotësojnë “kriterin” e të qenit nga Vlora, Çipi sqaron se janë të lirë të shkojnë ku të duan. “Me lojtarët që afruam këtë verë kishim bërë një marrëveshje, por nuk e kishim hedhur në letër. Ndërsa për futbollistët e huaj, duke përfshirë këtu edhe ata si Muzaka, janë të lirë të luajnë ku të duan pasi ne nuk u sigurojmë dot më rroga të majme”, thotë Çipi. Ai ka hedhur poshtë ndërkohë zërat për largim të Shpëtim Gjikës nga drejtimi i skuadrës.

Vetëm pak ditë më parë, Gjika kishte siguruar lojtarët se financat ishin të sigurta, por në prag të kampionatit ka plasur “bomba”, duke rezultuar krejt e kundërta. Edhe pse nuk thuhet zyrtarisht, përflitet se shkaku i krizës është largimi i sponsorëve të ndryshëm vlonjatë. Pjesa më e madhe e tyre kanë qenë biznesmenë ndërtimi, të cilët kanë kërcënuar me ndërprerjen e financimeve të ekipit për shkak të aksionit për prishjen e ndërtimeve të paligjshme në bregdetin e Vlorës. Në këto kushte, Gjika nuk mund të paguajë lojtarët e ardhur dhe skuadra do të detyrohet të mbështetet te të rinjtë e ardhur nga ekipet zinxhir. Flamurtari është një nga klubet më të shquar në Shqipëri për prodhimin e talenteve, megjithatë është e vështirë që ata të arrijnë të konkurrojnë në kampionatin e Kategorisë Superiore.