Lubjanë, Majlinda Bregu, në krye të Këshillit Rajonal

Ish-Ministrja e Integrimit Majlinda Bregu do të jetë për 3 vitet e ardhshme sekretarja e Përgjithshme e Këshillit Rajonal të Bashkëpunimit, që selinë e ka në Sarajevë.

Ky vendim është marrë në Lubjanë, ku janë mbledhur 13 Ministrat e Jashtëm të vendeve të Europës juglindore.

Gjatë votimit të kryer për këtë post, Bregu ka marrë 8 vota, ndërsa malazezi Igor Luksic vetëm 4.

Pas fitores së këtij posti, Majlinda Bregu ka reaguar menjëherë në rrjetin social “Facebook”, duke thënë se kjo fitore ka ardhur si rezultat i bashkëpunimit të vendeve anëtare, institucioneve shqiptare, Komisionit Europian, EEAS, Parlamentit Europian, familjes politike, dhe se përpjekja e tyre, sipas saj, vjen nga qartësia për ta parë si fitore të Shqipërisë.

Postimi i plotë:

Fituam❗

Unë fitova garën, por fitorja i takon vendit tim!

Faleminderit të gjithëve që besuan dhe më votuan për pozicionin e Sekretarit të Përgjithshëm të Këshillit të Bashkëpunimit Rajonal.

Mirënjohje të gjithëve, vendeve anëtare, institucioneve shqiptare, Komisionit Europian, EEAS( Shërbimi i Jashtëm i BE),Parlamentit Europian, familjes time politike EPP, e mbi të gjitha vendeve që votuan bindshëm kandidaturën time.

U përpoqën të gjithë, me qartësinë se drejtimi prej meje i këtij institucioni do të ishte fitore e Shqipërisë dhe shqiptarëve!

Jam e nderuar sot që për herë të parë më takon mua të drejtoj si e para shqiptare në një pozicion të lartë ekzekutiv, institucionin që ka si mision fuqizimin dhe rritjen e bashkëpunimit në vendet e Europës Juglindore!

Një falënderim miqësor për Ditmirin. Na ndajnë sinoret politike, por na bashkoi qasja Europiane dhe përpjekja për të punuar pro Shqipërisë!

E di që do të jetë një sfidë e vështirë, por nganjëherë e vështira është më e mira!

Kjo është hera e parë e këtij Këshilli që drejtohet nga Shqipëria, pasi në 6 vitet e fundit sekretar i Përgjithshëm ka qenë serbi Goran Svilanovic.

s.a/dita