AI kritika qeverisë për romët: Nuk bëri asgjë për të gjetur zgjidhje

Amnesty International reagoi sërish sot për çështjen e romëve që u dëbuan nga banesat e tyre në Rrugën e Kavajës. AI kritikon qeverinë për mosangazhim në gjetjen e një zgjidhjeje për familjet rome.

“Familjet rome, disa prej të cilave kishin 10 vjet që qëndronin në ish-qendrën për realizimin e punimeve artistike, në rrugën e Kavajës në Tiranë, u nxorën me forcë nga banesat e tyre më 7 gusht”, thuhet në komunikatën e AI. Amnesty International shkruan për shembjen e shtatë prej tetë banesave, përpara se policia t’i përgjigjej thirrjeve të zyrës së Avokatit të Popullit dhe OSBE-së në Tiranë dhe të ndalonte dëbimin dhe shembjet e mëtejshme.

AI thekson se pavarësisht se disa prej shtëpive të familjeve rome nuk janë prishur, ata kanë frikë të kthehen dhe për këtë janë detyruar ta kalojnë natën në rrugë.