Sadiku refuzon ftesën e De Biazit, anon nga Suedia

Loret Sadiku, i cilësuar nga trajneri i Helsinborgut si mbrojtësi më i mirë në Suedi, ka refuzuar për momentin ftesën e kombëtares, shqiptare, duke sqaruar se do të bënte të njëjtën gjë edhe me atë suedeze. Ai ishte thirrur nga trajneri Xhani De Biazi për ndeshjen miqësore kundër Armenisë, më 14 gusht në stadiumin kombëtar “Qemal Stafa”, por është përgjigjur negativisht, duke kërkuar më tepër kohë të mendohet për të ardhmen. Pas sugjerimit nga trajneri i Helsinborgut se ai duhet të thirret në kombëtaren suedeze, shoqëruar kjo edhe me interesimin e Shqipërisë, mbrojtësi ka pasur një bisedë me trajnerin e  Suedisë, Erik Hamren. Sigurisht që ky i fundit i ka shprehur interesimin, por nuk dihet nëse e ka thirrur për ndeshjen më të afërt. Nga ana tjetër, edhe pse ka kërkuar më tepër kohë për të vendosur, vetë lojtari është shprehur për median suedeze se “skuadrën time kombëtare e dimë unë dhe familja”. Një fjali e tillë të lë të mendosh se zgjedhja e lojtarit anon nga Suedia. Është e qartë që refuzimi i ngjyrave kuqezi do të sillte mjaft pakënaqësi te tifozët shqiptarë dhe atij mund t’i “rezervohej” i njëjti trajtim si më parë shqiptarëve të Zvicrës dhe Norvegjisë, nëse do të shpallte zgjedhjen për Suedinë. Ndërkaq, nëse do të ndodhte e kundërta, që të kishte zgjedhur Shqipërinë, Suedia është një vend shumë më liberal dhe i çliruar nga paragjykimet për t’i ofruar atij të njëjtin “trajtim”. Më parë, ai kishte deklaruar edhe për gazetat suedeze se i duhet të mendohet mirë, pasi futbolli është profesioni i tij dhe me atë mban familjen. Një argument që logjikisht nuk qëndron, pasi lojtarët paguhen nga klubet dhe jo nga kombëtaret, në një kohë që aktivizimi me Shqipërinë nuk i ka penguar shumë kuqezinj të luajnë me skuadra më të njohura e më të forta se Helsinborgu i Sadikut.