Një çift bashkëshortësh, që ishin shpallur në kërkim për mashtrim me pasoja të rënda, ka marrë masën e sigurisë “arrest me burg”.
Fisnik Kajolli, 34 vjeç dhe e shoqja, Migena Kajolli, 27 vjeçe nga Dërmënas i Fierit, kanë mashtruar persona të ndryshëm në qytetin e Fierit duke u premtuar se do i punësonin në kompani të ndryshme private.
Ata kanë arritur të marrin prej tyre shuma të konsiderueshme parash; në total 200 mijë euro.
Si funksiononte skema e mashtrimit:
Migena Kajolli, e cila dyshohet të ketë qenë ideatorja e kësaj skeme, u thoshte personave që u kishte marrë paratë se në telefonin e tyre do të mbërrinte një mesazh konfirmimi nga kompania.
Pasi kalonin disa ditë, në telefonat e personave që kishin paguar shumat e parave për t’u punësuar mbërrinte mesazhi i konfirmimit se, kërkesa e tyre për punësim ishte regjistruar në sekretarinë e kompanisë dhe po shqyrtohej.
Ndërkohë, për të qenë edhe më të besueshëm tek personat që mashtronin, bashkëshortët Kajolli nënshkruanin edhe akte noteriale me ta.
s.a/dita