Gjyqtari i “21 janarit”, para KPK: Fshehje pasurie dhe kontakte me të dënuar

Gjyqtari Tom Ndreca ka dalë sot para komisionit të Vettingut. Ai u përball me Komisionin e Pavarur të Kualifikimit, i cili u përfaqësua në këtë proces nga Brunilda Bekteshi, Roland Ilia dhe Firdes Shuli.

Sipas KPK, deklarimi i bërë nga Tom Ndreca është i pasaktë dhe ka mungesë të burimeve financiare. Gjithashtu Tom Ndreca ka kontakte me një subjekt të dënuar, pasi është kryer kontratë shitblerje e një makine midis shtetasit N.Gj që rezulton me precedentë penalë dhe gruas së Ndrecës.

“Deklarimi i bërë nga Tom Ndreca është i pasaktë dhe ka mungesë burimesh financiare. Ndreca ka apartament 120 m² dhe garazh 80 m², blerë në 2003 dhe apartament 92.26 m² tek ‘Komuna e Parisit’. Sipas DSIK, Ndreca është i përshtatshëm për të vijuar detyrën. Kemi kryer hetim të thelluar ndaj gjyqtarit Tom Ndreca dhe është konstatuar një kontratë shitblerje mjeti midis N.Gj e gruas së Ndrecës. Për N.Gj ka të dhëna që ka pasur precedentë penalë, pasi në vitin 2011, N.Gj është hetuar për prodhim narkotikësh dhe është i përfshirë në krimin e organizuar. Ndreca nuk e deklaroi në formular kontratën me shtetasin N.Gj. Tom Ndreca ka kontakte me një subjekt të dënuar dhe është i pa-përshtatshëm për të vijuar detyrën. Për Tom Ndrecën ka 11 denoncime, por rezultuan të pabazuara”- thuhet në raportin e KPK.

Ndreca është një emër i njohur i drejtësisë për opinionin publik dhe mediat. Ai ka qenë relator i çështjes “Tahiri” për bllokimin e pasaportës.

Po ashtu, ka qenë edhe gjykatësi që kryesoi në Kolegj Zgjedhor çështjen e numërimit të votave në Tiranë, duke rrëzuar kërkesën e Partisë Socialiste për shpalljen të pavlefshëm të vendimit të KQZ-së për numërimin e votave hedhur në kutitë e gabuara. Një vendim që shpalli fitues në garën për Bashkinë e Tiranës, Lulzim Bashën.

Ndreca rezulton se është bërë anëtar i Gjykatës së Lartë me propozim të presidentit Nishani dhe ka gjykuar dosjen e “21 janarit”.

Ndreca është diplomuar në Fakultetin e Shkencave Politike Juridike në degën e Drejtësisë në vitin 1980. Për një periudhë 4-vjeçare, ai ka punuar si prokuror gjyqësor dhe prokuror rrethi në Mirditë.

Në fund të vitit 2017, pasuria e subjektit rezulton e rritur me 4 herë duke kapur vlerën e rreth 22.8 milionë lekëve.

Pasuritë e paluajtshme zënë pjesën kryesore të pasurisë familjare të gjyqtarit Ndreca me një vlerë totale prej 15.4 milionë lekësh. Nga dy apartamente që deklaronte në vitin 2003, në fund të vitit 2017 ai zotëron familjarisht 4 apartamente të blera kryesisht me kursime.

Ai zotëron gjithashtu 6.9 milionë lekë llogari bankare, 300 mijë lekë kursime në cash dhe një automjet me vlerë 200 mijë lekë. Të ardhurat familjare të zotit Ndreca për të gjithë periudhën deklaruese përbëhen nga paga e tij dhe ajo e familjarëve. Në fund të vitit 2017, të ardhurat kapin vlerën e 39.1 milionë lekëve në total.

o.j/dita