“Armiq të askujt”, mediet bashkohen kundër Trumpit

350 organizata mediatike në Shtetet e Bashkuara do të nisin një fushatë për të kundërshtuar sulmet e presidentit amerikan, Donald Trump, si dhe për të promovuar shtypin e lirë.

“The Boston Globe” bëri thirrje javën e kaluar për një reagim të gjerë në shkallë kombëtare, ndaj “luftës së ndyrë” të presidentit kundër medieve, duke e titulluar atë #EnemyOfNone (Armiq të askujt).

Ekspertët e Kombeve të Bashkuara i cilësojnë deklaratat që Trump bën ndaj medieve si nxitëse të dhunës që mund të ushtrohet ndaj gazetarëve.

Konkretisht, Trump i etiketon raportimet e medieve si “lajme të rreme”, ndërsa gazetarët si “armiq të popullit”.

“The Boston Globe” kishte premtuar se do të shkruante më 16 gusht një editorial mbi rreziqet e sulmit të administratës mbi shtypin, e u kërkoi edhe medieve të tjera të bënin të njëjtën gjë.

Nismës iu bashkuan 350 gazeta të mëdha kombëtare e lokale, e mes tyre edhe të përditshme të rëndësishme ndërkombëtare si “The Guardian”.

Vajza e Trumpit, Ivanka e ka distancuar veten nga sulmet e babait të saj mbi mediet, ndërsa Sekretarja e Shtëpisë së Bardhë, Sarah Sanders refuzoi të thoshte se media nuk është “armiku i popullit”.

s.a/dita