A po e përkëdhelim shumë Greqinë?

Nga Guri Shyti

“Por të mashtrosh një popull të tërë, me seri, me ditë të tëra dhe më së shumti ndjekësit e tu, ata që të besojnw, që kanë shpresë te ty dhe ti motivosh për të bërë rrëmujë një vend duke provokuar incidente kjo është kriminale dhe për këtë nuk shpëton dot ligjërisht. Ky është një krim i rëndë”. (Nga një editorial i gazetës DITA, dt. 8.10.2018)

U bënë shumë vite që po përflitet, gati çdo ditë dhe në çdo organ shtypi, i ashtuquajturi “Pakti shqiptaro-grek mbi detin”.

Shumë specialistë, patriotë të këtij vendi, e stigmatizuan atë pakt të nënshkruar në mënyrën më të paturpshme nga qeveria e kaluar pëdëiste. Si përfundim Gjykata Kushtetuese e hodhi poshtë si një paçavure e nëshkruar nga tradhtarë të kombit. Por kjo nuk e ndali qeverinë greke të vazhdojë pazaret edhe me qeverinë socialiste, pazare që, në mënyrën më të pakuptimtë, vazhdojnë prej vitesh, në fshehtësi të plotë, gjë që të bën të mendosh se po zhvillohet një lojë e pistë në dëm të hapësirave detare shqiptare.

Që të bindemi për këtë mjafton t’i përgjigjemi pyetjes së thjeshtë: Kush e ka ngritur këtë problem? Dhe përgjigja është gjithaq e thjeshtë: Qeveria greke. Në këto kushte çdo shqiptari të ndershëm dhe patriot i lind e drejta të ngrejë zërin dhe të kërkojë llogari nga qeveria jonë se, pse qeveria greke po këmbëngul kaq shumë në këtë çështje? A mos po e bën sepse i vjen keq për Shqipërinë dhe kërkon t’i falë ndonjë copë det? Natyrisht që as e ka bërë dhe as e ka shkuar nëpër mend një gjë të tillë. Qeveria greke kërkon të zhvatë nga hapësirat detare, naftëmbajtëse shqiptare për të plotësuar orekset e veta ekspansioniste. Kushdo ka të drejtë të kërkojë llogari: Pse qeveritë tona, pavarësisht nga ngjyrosja, e pranojnë këtë pazar të qelbur? Secila prej tyre, në mënyrën më të turpshme, u ka hyrë këtyre pazareve vetëm që Greqia t’u japë votën për t’u futur në Europë, dhe pastaj këtë ta shfrytëzojnë në zgjedhje për të fituar ndonjë votë më shumë dhe të qëndrojnë në pushtet më gjatë.

Me që ra fjala për Europën, mendoj se na është bërë një lloj fiksimi hyrja në të, a thua se nuk jemi në Europë. Duke parë zhvillimet e fundit europiane, mendoj se nuk duhet të ushqejmë aq shumë iluzione. Mjafton të përmend deklaratat e fundit të qeveritarëve italianë. Kësht zv. kryeministri italian Di Maio deklaroi se BE ka edhe gjashtë muaj jetë, po kështu edhe kërcënimi i kreut të “Lidhjes së Veriut”, Salvini, gjatë takimit të këtyre ditëve me kreun e ekstremit të djathtë francez Le Pen. Pa folur pastaj për prirjet e shumë vendeve për të dalë nga BE.

Qeveria Rama nuk ka thënë asnjëherë që ne nuk do t’i japim Greqisë asnjë metër katror det, por ka thënë se pakti i ri do të jetë shumë më i mirë nga ai i qeverisë Berisha. Kjo do të thotë se Greqia, gjithsesi, do të marrë sipërfaqe nga ajo e detit tonë e njohur ndërkombëtarisht.

Për të zbuluar lojën e pistë që po bëhet, mjafton të shtrohet pyetja: Pse duhet t’i hyhej që në fillim kësaj pune, kur gjithçka ka qenë e përcaktuar shumë kohë më parë dhe ka qenë e njohur nga gjithë bota? Ose një pyetje tjetër edhe më pikante: Pse qeveria greke, derisa e ka pasur këtë problem, nuk ia kërkoi ndonjëherë Enver Hoxhës t’i falte një copë det? Dhe përgjigjet janë fare të thjeshta: Sepse në atë kohë “kishte çeçua biçak”, ndërsa tani grekët po përkëdhelen dhe, si të tillë, u është rritur oreksi të bëjnë shantazh me votën për të na pranuar në Europë. A nuk bënë të njëjtën gjë me Maqedoninë? Me pretekstin e pengimit të Rusisë për të mos u përhapur në Ballkan, po bëhen pazare në dëm të vendeve të tjera ballkanike dhe në favor të Greqisë. Ndërkohë që Greqia, si një shtet larg të qenit laik, është shpirtërisht më i lidhur me Rusinë, sesa me vendet e tjera të Europës, gjë që e vërteton dhe lajmi i fundit mbi ftesën që presidenti rus i ka bërë kryeministrit grek për të vizituar Rusinë.

Që qeveria greke nuk është e sinqertë në bisedimet me atë shqiptare duket edhe nga aqsa kanë dalë në media. Kështu, përshembull, ndonëse ka premtuar se do të heqë ligjin idiot të luftës me Shqipëinë, nuk ka bërë asnjë përçapje; ndërkohë që një popullsi të gjithë, siç janë ish-banorët autoktonë të Çamërisë, nuk i njeh fare, duke shtrembëruar të vërtetat historike dhe gjeografike me pretekstin absurd se “kanë qenë të lidhur me nazistët”. Përveç këtyre, nga deklaratat sporadike të politikanëve grekë del se ata nuk njohin as kufijtë tokësorë të Shqipërisë dhe këtë e vërteton fakti që Greqia ka rreth dy divizione përballë kufijve tanë, ndërkohë që ne nuk kemi asnjë kompani. Gjoja jemi edhe vende anëtarë të NATO-s(!). Këto janë fakte që shqetësojnë çdo patriot shqiptar, por jo politikanët tanë.

Opozita e sotme, duke qenë vetë e zhytur deri në fyt në llumin e tradhtisë, nuk e ngre dot zërin dhe bashkë me të t’u bëjë thirrje njerëzve të ngrihen për mbrojtjen e kufijve shtetërorë nga zhbërja, por ka zgjedhur rrugën e sajesave të pështira ala babale. Pikërisht për mbrojtjen e kufijve dhe paprekshmërinë e tyre duhet të ngrihen njerëzit të protestojnë dhe të kërkojnë doemos transparencë lidhur me bisedimet e fshehta, pastaj edhe mosprekjen e detit shqiptar. Mjaft na mashtruat zotërinj politikanë. Po kapërdijmë shumë nga mashtrimet tuaja, ndërsa për këtë që po bëni me “Marrëveshjen për Detin” nuk do t’ju falim, natyrisht me votë, duke braktisur kutitë e votimit, pasi mungon një organizim për rrugë të tjera më rradikale.

Z. Rama! Mjaft na torolisët kokën me hidhepritet me një dështak në politikë si Basha, të cilat neve njerëzve të thjeshtë të këtij vendi nuk na hyjnë në punë, dilni dhe thojuni zgjedhësve të PS-së, por edhe gjithë popullit, hapur, pa fshehur asgjë, se për çfarë po bisedohet me Greqinë, cili është qëllimi i atyre bisedimeve dhe cili do të jetë rezultati konkret. Pastaj nuk do të ishte keq që, ashtu siç u bë në Maqedoni për emrin, edhe tek ne të bëhej një referendum lidhur me bisedimet tuaja të fshehta.