Portali afër PD kërkon arrestimin e Spartak Brahos pas intervistës në Dita

CNA, portal afër PD, që njihet për qëndrimet kritike ndaj Bashës, kërkon arrestimin e Spartak Brahos për disa deklarata që ka dhënë në intervistën që po botohet prej disa numrash në gazetën DITA.

“Minimalisht ai konsiderohet si person në dijeni për ngjarjen dhe duhet të thirret në prokurori. Kanë prova dhe fakte, të cilat i kanë fshehur për gjithë këto vite, ndaj duhet të arrestohen si persona që kanë penguar drejtësinë, apo që kanë fshehur një krim” – shkruan CNA duke përfshirë edhe deklarimet e fundit të avokatit Ngjela.

Më poshtë pjesë nga editoriali i këtij portali:

“Deputeti Spartak Braho, në një intervistë të dhënë në gazetën “Dita”, ka deklaruar një sërë dokumentesh që hedhin dritë mbi atë se çfarë ka ndodhur në Shqipëri në vitin 1997. Si një politikan në moshë dhe një jurist me përvojë duhet ta dijë se minimalisht ai konsiderohet si person në dijeni për ngjarjen dhe duhet të thirret në prokurori. Të paktën duhet të shkojë në prokurori, duhet të meret në pyetje.

Ashtu siç ndodhi edhe me avokatin Spartak Ngjela një ditë më parë, i cili foli për vrasjen e Artan Santos, për të cilin tha se “U vra për pastrimin e 3 miliard eurove. 3 miliardë euro janë transferuar me pastrim parash nga ajo bankë”.

Këta minimalisht duhet të merren në pyetje si persona që kanë dijeni mbi ngjarje kriminale që kanë tronditur jo pak opinionin publik apo për ngjarje që kanë destabilizuar Shqipërinë. Në qoftë se vërtetë kanë prova dhe fakte, të cilat i kanë fshehur për gjithë këto vite, duhet të arrestohen si persona që kanë penguar drejtësinë, apo që kanë fshehur një krim”.

b.m. / dita