Berisha ka privatizuar edhe… Gardën e Republikës

Deri në sekondën e fundit të pushtetit kanë vazhduar privatizimet “emergjente” të firmosura nga Berisha. Një vendim i marrë në 5 Shtator, zbardh privatizimin e rreth 7.5 dynym pronë e Gardës së Republikës dhe kalimin e kësaj prone për katër familje në Tiranë.

Duket se e gjithë procedura e këtij privatizimi është mbyllur brenda 1 muaji, me emergjencë dhe “mbështetje” të fortë nga disa institucione shtetërore. Gjithçka ka nisur më datën 2 Gusht 2013 (kur qeveria ishte rrëzuar me votë) kur kreu i AKKP-së Avenir Peka merr kërkesën nga 4 familjet (Përnaska, Nishku, Kazanxhi dhe Dema) për të njohur të drejtën e tyre për kthimin e pronës që ishte në përdorim të Gardës së Republikës. Nga dokumentacioni, rezulton se familjet e kishin bërë të njëjtën kërkesë dhe një vit më parë, në Shtator të vitit 2012, por AKKP-ja e kishte rrëzuar si kërkesë asokohe.

Arsyeja ishte se prona që ata pretendonin për t’iu kthyer ishte në përdorim për interes publik dhe strategjik pasi shfrytëzohej nga institucioni i rëndësisë së veçantë i Gardës së Republikës. Por përfaqësuesit e familjeve iu drejtuan AKKP-së një vit më vonë , por kësaj here kishin dhe një dokument shtesë.

Preteksti

Në kërkesën e dytë drejtuar AKKP-së familjarët paraqitën dhe një shkresë të ministrit të Brendshëm Flamur Noka, që sqaronte se AKKP-ja mund ta shqyrtonte këtë si rast, pasi në ndryshim me një vit më parë, tashmë prona nuk përbënte më interes për përdorim nga ana e Gardës së Republikës. Kjo shkresë e ministrit i hapte automatikisht rrugë procedurës së kthimit të pronës nga AKKP-ja të 7.5 dynym truall dhe pronës në përdorim të Gardës së Republikës. AKKP-ja më datën 20 Gusht 2013 përfundoi të gjithë procedurën e saj të verifikimeve dhe vendosi me PO, këto familje mund t’i merrnin pronat e tyre të cilat ndodhen në një nga zonat më të lakmuara dhe më të rëndësishme të Tiranës. Rreth dy javë më vonë, më 5 Shtator 2013 qeveria firmos heqjen e këtyre pronave nga Garda e Republikës dhe një ditë më vonë Gjergj Lezhja , Sekretari i Përgjithshëm i Kryeministrisë i kërkon Gardës së Republikës që të bëjë zbatimin e vendimeve në terren sipas parcelave të pronësisë të përcaktuar në vendim. Plot 7.5 dynym pronë iu hoq Gardës së Republikës.

Prapavija

Pasi bëhet e qartë e gjithë procedura maratonë 1 mujore e kalimit të pronës nga Garda e Republikës shtrohen disa pyetje:

1. Çfarë ndodhi në vetëm një vit, që të miratohej lëshimi i një prone në vitin 2013, ndërsa për të njëjtën pronë në vitin 2012 kërkesa ishte refuzuar?

2. Çfarë përfaqësojnë këto prona për Gardën e Republikës? 3. Çfarë e nxiti qeverinë dhe zyrtarë të lartë shtetërorë të kopsitnin letrat në vetëm 1 muaj?

Nga të dhëna paraprake mësohet se pronat që tashmë po u kthehen ish-pronarëve, 4 familjeve, janë përdorur nga Garda kryesisht si prona me vlerë nëntokësore. Në këto troje janë të shtrirë tunele dhe ambiente të nëndheshme, të rëndësisë së veçantë që janë parashikuar për sigurimin e funksioneve të Gardës në situata emergjence dhe rreziku të lartë, por edhe për një shfrytëzim të domosdoshëm gjatë aktivitetit normal të punës së Gardës. Në këto ambiente kanë qëndruar shumë pajisje dhe mjete të rëndësishme logjistike të Gardës së Republikës. Pra bëhet fjalë për “heqjen dorë” nga ana e Gardës nga disa ambiente të rëndësisë së veçantë. Punonjës dhe kuadro të lartë të Gardës së Republikës kanë qenë të shqetësuar gjatë javëve të fundit për këtë që po ndodhte, në kontakte private ata shprehen se vendimi shkon tërësisht ndesh me interesat e institucionit të Gardës së Republikës. Por, kreu i Gardës, ministri i Brendshëm dhe vetë Kryeministri nuk e kanë parë si të tillë. “Dashuria e madhe” e Berishës me Gardën, mori fund, në mbledhjen e fundit të qeverisë më 5 Shtator.

Garda dhe apartamenti i ministrit

Ish-Ministri Flamur Noka, prej rreth një viti banon në pallatin mes Gardës dhe Liqenit Artificial, një nga godinat më të shtrenjta të Tiranës. Kjo godinë është pikërisht në kufirin e Gardës së Republikës, ata që banojnë në Tiranë e kanë të lehtë ta bëjnë lidhjen. Se si është bërë pronë e zotit Noka apartamenti në fjalë është një histori më vete, po me sa duket zoti Noka në soditjet e tij nga ballkoni, është “frymëzuar” nga jeshillëku dhe tunelet e Gardës. Të shohim nëse ky vendim skandaloz për marrjen e të cilit shkresa e ish-ministrit ka patur një rol vendimtar, do mbetet në fuqi.