FOTO: Rama dhe Ulaj pak ditë para skandalit të Unazës. Në një… kazan?

Fotot e mëposhtme janë shkrepur në fundin e këtij nëntori në ceremoninë e inaugurimit të televizionit A2, i cili ka nisur transmetimet kohët e fundit si “kanal i afiluar i CNN” dhe është një investim i biznesmenit Bashkim Ulaj.

Ulaj është personi që fshihet pas skandalit të tenderit të Unazës së Tiranës sipas një raportimi të Zërit të Amerikës dhe ideatori i krijimt të kompanisë fantazëm që ka fituar këtë tender si dhe një tender tjetër në OST, të dyja bashkë një aferë prej rreth 30 milionë eurosh vetëm brenda pak ditësh.

Ulaj njihet si biznesmeni i familjes Berisha dhe është donatori i disa pronave të tij përfshirë zyrën ku Berisha qëndron aktualisht.

Pak ditë më parë gjatë një seance në Parlamentin malazez një nga politikanët kryesorë të atij vendi e akuzoi Ulajn për trafik droge dhe pastrim parash.

Bashkim Ulaj po investon aktualisht në zonën turistike të Kolashinit në vlerën e 13 milionë eurove, afërsisht sa tenderi i Unazës.

Kryeministri Rama, i cili premtoi para ardhjes në pushtet ndëshkimin e oligarkisë së lidhur me krimin ekonomik, ishte në ceremoninë e hapjes së kanalit të Ulajt, pak ditë para zbulimit të skandalit të Unazës.

Madje mbajti dhe një fjalë përshëndetëse.

“Ose do e rregullojë CNN kazanin ose do kthehet vetë në kazan”, tha ndër të tjera Rama.

Kryeministri ka mbajtur një qëndrim shumë të diskutueshëm publik lidhur me skandalin e Unazës.

Për të cilin “CNN shqiptar” nuk ka raportuar asgjë.

Interesant do ishte të dinim për këtë mungesë profesionalizmi mendimin e kryeministrit Rama, i cili njihet për rreptësinë e tij kur vjen fjala tek mediat:

Është kthyer apo jo në kazan që në hapat e parë “kanali i afiluar i CNN” në Shqipëri?

b.m. / dita